Video da 3ª xornada da LNB, o de Moaña.

Amil gaña en Moaña; Luis Enrique presiona na clasificación

• Paquete Pinchas gaña por equipos e mantense líder
  
• Almuinha dá moita guerra: meteu a dous en semis e ponse 2º na xeral
• Temos equipo novo: Iríache Mellor
• Branco e Negro bate un récord: conseguir 1 só punto nun torneo
  

Pasou unha xornada máis, a terceira xa, e veu demostrar que aínda que parecía que Chupi arrancaba arrasando, este ano a liga vai estar moi igualada. Os 101 dálmatas da billarda que se congregaron en Moaña á chamada dos da Ghudalla demostraron que hai talento e competitividade, e que as vitorias se venden caras. Clicade aquí para ver todas as fotos.

Os Andrés Montes e Salinas das retransmisións da billarda

Desta volta o gañador foi Amil, dos Paquete Pinchas, que se estrea como vencedor dun aberto oficial. Amil tiña o brazo solto, como demostrou cun varado en cuartos de final e con seriedade e concentración conseguiu facerse co torneo vencendo na final a Jurjo. O de Almuinha chegaba por primeira vez a unha final: é un xogador regular que sabiamos que un día ou outro ía ter a súa oportunidade de chegar lonxe nos torneos.

Amil, vencedor en Moaña

En semis quedaron Óscar dos Currichos (4º), outro xogador regular con calidade para sorprender, e Luis Enrique de Almuinha (3º), que colleitou 8 puntos por segunda xornada consecutiva. Válenlle para colocarse 2º na xeral, con 21 puntos e a só 2 de Chupi. O líder dos Paquete Pinchas desta volta caeu en 16avos, e perde boa parte da súa vantaxe na clasificación. Amil escalou ata a 3ª posición da xeral, na que empata con Rubén Otero a 17 puntos. Por detrás quedan Davide de Pincharango (16 ptos.), Panzo da Ghudalla e Manolo de Se Foras Traballar con 14 e Xosé Miguel de Faísca e Tiago dos Currichos con 13.

Cara, ademais de palanador, é un excelente canteiro que fixo o trofeo para o mellor equipo

Palanadoras acertadas

No torneo de Moaña as palanadoras estiveron máis atinadas que en xornadas anteriores. Catro conseguiron pasar de grupos. Ana Diz foi a mellor no seu grupo e colleitou 4 puntos que lle permiten poñerse líder da clasificación feminina con 6. Tamén pasaron ás roldas Benchara de Se Foras Traballar (unha das sorpresas da xornada), María da Ghudalla (unha xogadora na que o equipo ten postas moitas esperanzas) e Fátima (a máis regular das palanadoras).

Duelo Paquetes-Almuinha

Máis mexilóns para os Paquete Pinchas

Os mellores equipos da xornada foron Paquete Pinchas e Almuinha. Parece que aos dous equipos se lles dá ben xogar en Moaña, porque o ano pasado empataron a puntos e este ano foi por un puntiño que os de Pontellas levaron de novo os mexilóns para casa. Tamén fixeron unha gran xornada Se Foras Traballar, un equipo que mellorou moito coas novas fichaxes e co excelente estado de forma de Manolo, e Pincharango, que logo de tres xornadas xa non son unha sorpresa para ninguén. Por outra parte, Branco e Negro bateu un récord insuperable no torneo: a puntuación máis baixa lograda por un equipo nun aberto: 1 punto, meritorio se temos en conta a cantidade de xogadores que presentaron.

A Almuinha faltoulle un puntiño... pero de todas formas están contentos

Hai que engadir que en Moaña debutou un equipo que agardemos que teña continuidade: Iríache Mellor. Un dos seus, Iago, conseguiu clasificarse e asinar un varado. Rubén Otero fixo outro, que lle serve para empatar con Chupi na segunda praza da clasificación de brazos duros. Tamén fixeron un Amil, Fredo e Josué.

Cita en Maceda co Castañazo

Cambiando de tema, este sábado 24 de agosto celébrase en Maceda (Ourense) o Castañazo. Ademais de escoitar ao Sonoro Maxín, Os Tres Trebóns, Som do Galpóm e Fracasados de Antemano, se vos pasades por alí podedes participar no torneo de billarda que organizan a partir das 16.30 h. Hai posibilidade de durmir nun pavillón de balde e de cear por 6 euros, pero para iso hai que avisar canto antes. Apuntádevos!

E para rematar, aquí podedes ver o vídeo do anterior torneo, o 2º da liga no Porriño.

3ª xornada: collede as cachisas… volvemos a Moaña

Atención palanadores e palanadoras: este mes temos ración dobre de billarda. Se no Porriño zoaron as pinchas, en Moaña van bailar as cachisas! O 2º Torneo de Cachisa de Moaña vaise celebrar este sábado 17 de outubro no IES Paralaia ás catro da tarde, organizado pola Asociación Cultural A Ghudalla. Na súa web podes atopar un mapa para non perdervos no camiño.

En Moaña volveremos poñer a proba o record de participantes nun torneo da LNB, co reto que supón para sacar un torneo adiante antes de que caia o sol. Pero tranquilos: desta volta temos pavillón. E ademais estrearemos un novo sistema de sorteo. Dado que o bombo da LNB Sur non ten máis que 90 bolas e xa se nos quedan escasas para a cantidade de participantes que somos, imos pasar do analóxico ao dixital: abandonamos o bombo e faremos o sorteo por sistema electrónico. Billarda hi-tech!

O enxeñeiro que deseñou o supercomputador que se usará no sorteo nunca xogou á billarda

Esta entrañable imaxe de Fuco e Fátima sacando nomes do bombo da LNB non se volverá repetir

Chupi e os 108 palanadores

• Chupi e Paquete Pinchas, gañadores da xornada
  
• Record de participación na LNB: 108 palanador@s
• Pincharango confírmase como equipo revelación

A Chupi parece que a competencia lle senta ben. Cando a LNB Sur está máis igualada que nunca, cunhas cotas de participación en cada xornada espectaculares e cuns palanadores e palanadoras cada vez en mellor estado de forma, o Ninja de Pontellas desmárcase na clasificación gañando dous torneos seguidos, os dous primeiros da tempada.

Este sábado no monte da Risca volveuse marcar un record de participación nun torneo de billarda: 108 palanadores participaron no II Torneo de Pincha do Porriño “Festas do Cristo”. A esplanada da Risca converteuse no Rolland Garros da billarda, con catro pistas para xogar de forma simultánea. Unha infraestrutura necesaria para administrar a marea de xogadores desta tempada, que desborda espectativas.

Chupi gañou de novo con autoridade. Aínda que comezou con dúbidas no seu grupo, resolveu todos os cruces con solvencia, e iso que lle tocou bailar cos máis feos… no sentido deportivo, por suposto. No seu camiño caeron Pablo dos Paquete Pinchas (gañador en Vigo o ano pasado), Xosé Miguel de Faísca (líder dos varados), Davide de Pincharango (o xogador revelación da tempada) e Rubén Otero dos Lideiras (o campión nacional e o seu máximo rival).

Na final agardábao Luis Enrique, co que xa coincidira no grupo clasificatorio. O de Almiuinha confirmou as boas sensacións que dera o ano pasado e en Redondela ao colarse na súa primeira final. Para chegar aí tampouco tivo un camiño fácil: eliminou a Manolo de Se Foras Traballar (que comezou a liga nun espléndido estado de forma), Fran dos Trece Catorce (campión no Aberto da Poesía de Salvaterra), Lolo de Pincharango (un debutante que apunta boas maneiras) e Amil (que brillou a un altísimo nivel).

A final

A final prometía ser emocionante, pero Chupi deixounos a todos coa boca aberta: fixo un varado espectacular que arrancou as ovacións do público que rodeaba a pista. Resolveu desta maneira o torneo, sen darlle oportunidade ao seu rival para superar o shock. A loita polo terceiro e cuarto posto foi reñida: Rubén Otero e Amil empataron con dous lanzamentos espectaculares nos que deixaron a billarda a un metro do varal no seu primeiro golpe. No desempate, Otero fíxose coa terceira praza.

Así quedamos co varado de Chupi na final

Varados e clasificación feminina

As pistas da Risca eran longas, máis ben estreitas e cunha superficie de xabre que facía complicado levantar a billarda. Aínda así houbo dous varados: o de Chupi na final e outro de Rubén Otero. As condicións da pista atragantáronselle ás mellores palanadoras, de xeito que entre as mulleres só Fátima acadou a 3ª praza do seu grupo. E non o fixo nun grupo fácil, pois nel estaban os dous que chegarían á final. Agora encabeza a clasificación feminina empatada con Pauliña dos Treze Catorze, con 3 puntos cada unha.

As mellores equipas

Os Paquete Pinchas proclamáronse mellor equipo da xornada grazas ao 4º posto de Amil e o 1º de Chupi. Por un punto impuxéronse aos Pincharango, que demostraron que as boas vibracións que transmitiron na primeira xornada non eran casuais: Davide, Lolo, Arturo e Lemos firmaron actuacións destacadas e sumaron 19 puntos para o equipo, que xa é segundo na clasificación xeral con 32 puntos, só por detrás de Paquete Pinchas, que ten 38.

Outros que estiveron moi finos no Porriño foron Se Foras Traballar. Se na primeira xornada non lograron bos resultados, nesta ocasión sumaron 17 puntos grazas ás boas actuacións de Luis e Manolo e de dúas fichaxes deste ano: Pedro e Juan. Isto serviulles para subir do posto 11º da clasificación ao 5º. Na clasificación xeral por equipos, colócase en 3ª posición Almuinha, moi regulares, e na 4ª A Ghudalla, que este sábado pincharon no Porriño.

Os 8 mellores, de 8 equipos diferentes

A clasificación individual está comandada por Chupi co seu pleno: 10 + 10. A segunda praza compártena Rubén Otero, Luis Enrique e Davide, con 13 puntos. Quinto é Xosé Miguel da Faísca con 11 puntos, e na sexta praza empatan con 9 Pablo (Culombio), Jacobo (A Ghudalla) e Manolo (Se Foras Traballar). Un dato que fala do igualada que arranca a liga entre os equipos é que os 8 primeiros na clasificación individual, os que ocuparían os postos que dan acceso ao Play-Off, pertencen a 8 equipos diferentes.

Tres gañadores na quinibillarda

A Quinibillarda do sábado recadou 30 euros en 30 apostas. Houbo 3 gañadores, que apostaron por Chupi e polos Paquete Pinchas: a nai, a moza e o irmán de Chupi. Eles repartíronse o 70% reservado para premios, é dicir, 21 euros, 7 euros cada un.

Xa podes consultar a clasificación no apartado correspondente do blog, e podes ver fotos do torneo no FotoVaral.

2ª xornada: este sábado no Porriño… a polos 100!

A LNB Sur volve á carga este sábado 3 de outubro no Porriño. A vila do Louro está en festas, e que mellor maneira de celebralo que co II Torneo de Pincha “Festas do Cristo”. Ás catro da tarde do sábado do Re-Cristo, os palanadores e palanadoras meridionais xuntaranse no curuto máis próximo ao centro urbano: o Monte da Risca. Para atopalo, botádelle un ollo ao mapa (vén marcado en verde). Na explanada montaremos o noso peculiar Roland Garros, con tres ou catro pistas na que xogar de forma simultánea. Ollo, que se chove a cousa trasládase ao pavillón de Atios: se é así, xa vos informaremos do seu emprazamento.

O torneo organizámolo coa colaboración do Concello do Porriño, que ofrece os premios para os mellores da xornada, a base de produtos cárnicos cortesía de Coren-Frigolouro e bebidas de calidade. Coidado, que che hai moita xente con ganas de comer e beber ben… non só os que estiveron a gran altura en Redondela turrarán por levarse os premios. En Ponteareas celebrouse hai un par de semanas un torneo amistoso no que chegaron á final dous que en Redondela estiveron pouco finos: Carlos Amil dos Paquete Pinchas (que venceu o torneo) e Manuel, de Se Foras Traballar. Eles e moitos outros teñen ganas de vitoria e de porco.

Bateremos no Porriño o record de xogadores nun torneo? A cifra redonda dos 100 palanadores quédanos a tiro de pedra, e o escenario é o mellor para conseguilo. Animádevos, o premio é sustancioso, e a compañía inmellorable.

Electrocútate co videoestalo de Redondela

A LNB é unha canteira de talentos que trascende o deportivo. Non só concentra algúns dos mellores palanadores e palanadoras do universo, senón que os hai que van máis alá e amosan as súas habilidades en facetas tan dispares como o audiovisual.

Aquí temos unha boa mostra dese talento cun novo videoestalo de Pablo Suengas. Sons electrónicos mesturados co timbre opaco dos paláns e as billardas: ritmo e emoción, deporte e cantina, todo mesturado cos espectaculares efectos psicotrópicos do Michel Gondry da billarda.

Fotos e analise da primeira xornada

Equipas:    A Ghudalla, evolución da equipa Moaña, venceu en Redondela. O pasado ano tras un frouxo comezo progresaron ata o 4º posto, esta tempada ademais de manter o bloque suman novos reforzos, xuntos puntuaron nas catro disciplinas e postúlanse coma un dos favoritos na presente campaña. Os Paquete Pinchas quedaron ás beiras do éxito,  ainda que acusaron algunas baixas tentarán revalidar o seu título: duro rival a bater. Amuinha comezou con paso firme, meteu a catro dos seus na segunda fase sendo a quipa máis sólida. Pincharango foi a sensación do aberto, estrea por todo o alto, xa están cuartos.

A Faisca firmou un bo papel  e con algo mais de tino nos desempates, perdeu ata catro, faríase cos chocos do campión. Con 10 puntos empatan: Os Currichos, que puxeron billarda de pata negra pero tamen algunha pezuña que os privou dun mellor posto. Lideiras e Culombio non tiveron o seu mellor día pero o oficio dos seus xogadores salvou a xornada.  Oestrimnios pese a ser unha equipa debutante conta con 3 finalistas en abertos na pasada tempada, ollo á súa evolución.

Moi próximos na clasificación están Treze Catorze, que cargou coa maldición do organizador, Branco e Negro que pese a acudir xustiños de palanadores salvaron os mobles,  e Se Foras Traballar que ainda non retomaron o punto de forma da Cunca Xíbara. Os Roxos pagaron a sua inexperiencia en abertos da LNB, teñen por diante toda unha tempada e moito marxe de mellora.

Pauliña encabeza a clasificación feminina tras unha gran xornada inicial na que foi de menos a mais. Malia non entrar na 1ª carreira e facer 3ª na segunda vence una definitiva o que a levou a un desempate no que dun golpe se desfixo de seis palanadores. Na eliminatoria seguinte falloulle a sorte e o seu último golpe saíu polo lateral.

Ana Diz pese a facer 12 puntos  nunha gran primeira fase o infortonio cebouse con ela en dous desempates consecutivos. Fátima tamen se quedou as portas da segunda fase ao caír nun desempate. Outras favoritas coma Ana e Chus non tiveron una tarde afortunadas nunha tempada na que estarán caros os pases os play off, pois por detrás veñen gañando carreiras palanadoras coma María, Esme ou Mucha.

Chupi comeza a tempada coma cerrou a pasada, líder. O dos Paquete mostrouse forte no inicio gañando o grupo, nas eliminatorias eficiente e aínda que máis dubidativo fixo valer a súa experiencia nas finais.  Xacobo foi o xogador revelación do torneo grazas ao seu xogo de toque que o levaba ata o varal en dous golpes. Xosé Miguel, que cerrou o podio, destacou coma o bombardeiro da conferencia e escápase na clasificación de varados. Davide encabezou os Pincharango, un novo aspirante ao título da LNB ao que so lle resta resolver as finais.

Por detrás deles un grupeto con Manolo (SFT), gran actuación na que tamén sumou varado, Rubén, o campión nacional caíu cun varado de Chupi, Pablo, xogador franquicia dos Culombio, Alberte e Luis Enrique que combinan forza e clase para Almuinha, e Gil, que pese a ter varias ofertas de pretempada continua á fronte dos Branco e Negro.

A partir de aí 87 palanadores máis todos os que non puderon acudir a primeira cita, que agardan nove abertos puntuables por diante, outras pistas mais propicias e dous resultados para descartar.

Máis fotos

Chupi deixa claro quen é o campión

• A Ghudalla é o primeiro líder por equipos ao vencer en Redondela
• Xosé Miguel da Faísca solta o brazo e consegue tres varados nunha tarde
• Record de participación na LNB: 95 palanador@s
• Debut de catro equipos: Pincharango, Oestrimnios, Os Currichos e Os Roxos

A nova tempada da LNB Sur comezou ao grande, tanto que se nos acumulan os titulares para describir como foi a primeira xornada en Redondela. Alí estiveron 95 xogadores e xogadoras, record absoluto da LNB nun aberto. Tal número de palanadores obrigáronnos a xogar en grupos de 9 ou 10 xogadores para que a xornada non se eternizase.

Boa parte do éxito da convocatoria débese á aparición de catro novos equipos: Pincharango, con sede no bar Charango de Salceda; Os Currichos de Ponteareas, que substitúen ao Assembleia Aberta; Oestrimnios, nacido dunha escisión dos Paquete Pinchas e con sede en Pontellas (O Porriño); e Os Roxos, orixinarios de Sanguiñeda (Mos).

Con dúas pistas rápidas e estreitas, o torneo prometía ser áxil, aínda que o elevado número de xogadores estirou a xornada. Parecía factible que houbese un bo número de varados, e ao final caeron 9, dos que Xosé Miguel firmou 3. O da Faísca parecía en plena forma, logo de percorrer todos os abertos de verán que houbo nos últimos tres meses.

Xosé Miguel pintaba como favorito para xogar a final, pero en semis topouse cun inspirado Jacobo da Ghudalla (o equipo antes coñecido como Moaña), que deu a sorpresa e se colou na gran final. Polo outro lado do cadro chegou a semis un debutante, xogador revelación da xornada: Davide de Pincharango. Enfrontouse a Chupi, que con gran seguridade introduciu a billarda no varal en dous golpes. Pero a Davide non lle tremeu a man e fixo o mesmo, forzando o desempate, que Chupi desfixo ao seu favor. Na loita polo terceiro e cuarto posto, foi Xosé Miguel quen conseguiu vencer.

Na gran final impuxéronse os nervios e tanto Jacobo como Chupi cometeron varios erros. Pero para Jacobo era a primeira final nun torneo da LNB Sur e para Chupi era xa a quinta, así que este fixo valer a súa maior experiencia e levouse a vitoria. Colócase así como primeiro líder da LNB Sur 2009-2010, ao igual que xa fixera o ano pasado no primeiro torneo. O vixente campión da LNB Sur acumula con esta tres vitorias en abertos puntuables.

Pero Jacobo non quedou sen premio. A súa gran actuación permitiu á Ghudalla gañar o premio por equipos e convertirse nos primeiros líderes por equipos da tempada, con 19 puntos. Con 18 quedan Paquete Pinchas, 15 teñen Almuinha e 13 a Faísca e os debutantes Pincharango.

Na clasificación individual, logo de Chupi (10 puntos) e Jacobo (8), atópanse Xosé Miguel e Davide con 7 puntos. Despois hai 6 xogadores con 5 puntos: Manolo de Se Foras Traballar (gran xornada), Rubén Otero de Lideiras (o campión nacional caeu ante o seu maior rival, Chupi), Alberte e Luís Enrique de Almuinha, Pablo de Culombio e Gil de Branco e Negro.

Logo desta primeira xornada lidera a clasificación feminina Pauliña dos Treze Catorze, a única muller que desta volta conseguiu pasar a dezaseisavos. Menos sorte tiveron Ana Diz de Faísca e Fátima de Culombio, que quedaron fóra desta rolda a perder os seus desempates.

As próximas xornadas da LNB Sur son o mes que vén. O sábado 3 de outubro xogarase no monte da Risca do Porriño, onde disporemos de 3 ou 4 pistas para axilizar o desenvolvemento do torneo. E o 17 de outubro a billarda viaxa á terra da cachiza, Moaña, para xogar de novo á beira do mar, nun escenario inmellorable.

Este sábado en Redondela… comeza o espectáculo!

Calma, xente! Parecía que non chegaba o momento, pero xa está aquí o comezo da nova temporada de billarda. A Conferencia Sur da LNB arranca este sábado 12 de setembro en Redondela. O campionato forma parte da programación da Foliada, VI festival de intercambio Galiza-Catalunya. Os da asociación Treze Catorze de Salceda bótanlle unha man á xente de Redondela para organizar este torneo.

A convocatoria é ás 16.30 horas na alameda de Redondela, concretamente na pista de futbito que está a carón do auditorio da Xunqueira. Podedes ver o mapa no apartado “Mapa e calendario” (é o puntiño verde).

A primeira xornada está chamada a deparar sorpresas. Este verán xa comprobamos que hai moitos equipos que se sinten fortes e queren plantar batalla aos favoritos e actuais campións, os Paquete Pinchas. Faísca e Almuinha non queren renunciar ao seu papel de aspirantes, Culombio quere demostrar que a vitoria na Cunca Xíbara non foi flor dun día, Treze Catorze chega en plena forma logo de que dous dos seus acaparasen a final do Aberto da Poesía en Salvaterra, e equipos como A Ghudalla (anteriormente coñecido como Moaña), Lideiras, Se Foras Traballar e Branco e Negro volven con forzas renovadas.

Ademais para esta tempada temos xa confirmada a presenza de polo menos tres equipos novos: os Pinchas Bravas, nacidos dunha escisión dos Paquete Pinchas; Os Currichos, que substitúe a Assembleia Aberta e incorpora novas fichaxes; e outra equipa nova creada por veteranos e mozos da comarca da Louriña.

A revolución non será televisada, e a LNB tampouco… vas ter que estar alí!

Fran vence no II Aberto da Poesia

Os libros e o viño do condado foronse para Salceda nas mans dos Treze Catorze que sairon triunfantes do II aberto da poesía no que Fran precisou dunha rolda de desempate para imporse na final o seu compañeiro Chiwi.

Os palanadores da conferencia sur medíronse no xabre de Salvaterra antes do inminente comezo da nova tempada en Redondela. Alí pudemos albiscar pistas sobre o estado de forma dos nosos Palanadores. A cara mais positiva puxeronna os treze catorze que ademais de meter a Fran e Chiwi na final colaron a varios dos seus na segunda fase (David, Nando, Anxo…) e presentan a sua candidatura a liga regular. A gran altura estiveron tamén os semifinalistas, Gil que estivo a piques de revalidar triunfo, e Pablo Suengas que comeza como rematou a pasada campaña,incomensurable. A Cruz en Salvaterra puxeronna algúns dos favoritos aos que o verán pasou factura, Rubén, Chupi ou Elvis sufriron para pasar a primeira rolda e cairon na seguinte dando mostras de fraqueza para o futuro.

O aberto da Poesía foi tamén escenario para a presentación das novas fichaxes dos Paquete Pinchas, Treze Catorce, Pinchas Bravas (escisión  do Paquete Pinchas liderada por Elvis e Anibal) e Os currichos, reforma da Assembleia Aberta impulsada por Tiago (Palanador antes conocido coma Santi)