10 de Maio: O Xerro do Salnés

28 04 2009

O vindeiro 10 de Maio terá lugar a Copa Salnés na parroquia de Xil (Meaño) ao carón da Capela das Angustias. Esta nova cita da LNB ten como gaio principal a desputa do ansiado Xerro do Salnés, actualmente en mans da conferencia Sur.

xerro


Esta e unha cita moi especial para o Sur, xa que o pasado ano foi aquí onde nos estreamos coma conferencia. Ademais foi tamén primeiro contacto dos nosos palanadores cos compañeiros de Lugo e A Coruña, primeiro nun roteiro polos furanchos pasando revista ao albariño e o viño de Barrantes, despois no xantar e finalmente a golpe de palán sobre a empinada pista das anguntias, donde reforzados pola xente de meaño fomos quen de impornos aos ata daquela invicta conferencia norte.

O programa para este ano e o seguinte:

-Punto de encontro na Taberna da Cancela ás 12H

-ruta polos furanchos

-xantar no Restaurante O Noso Bar:

Menú: paella de 1º, polo de 2º,postre, pan, auga e viño
(os vexetas so teñen q avisar antes) Prezo: 11 Euros.

-Aberto do Xerro do Salnés:

xerra

-O torneo desputarase na modalidade de Aberto.

-Os enfrontamentos sortearanse antes do torneo.

-O gañador individual recibirá viño do salnés

-A conferencia gañadora resultaraá da clsificación do aberto:

-A conferencia gañadora recibirá o Xerro do Salnes

-Poderan participar cantos xogadores o desexen para cada conferencia

-Puntuaran os 10 palanadores que mellor resultado acaden en cada conferencia

-Os puntos finais de cada conferencia serán a suma dos puntos dos seus 10 mellores palanadores.

-Os puntos repartiranse da seguinte maneira:

Campión – 10 Puntos

Subcampión – 9 Puntos

Semifinalistas – 8 Puntos

Cuartofinalistas – 6 Puntos

Oitavo Finalistas – 4 Puntos

Dezaseisavos – 3 Puntos

Fase de Grupos – 1 Punto

-Durante a celebración do torneo iranse sumando os puntos de cada conferencia e retrasmitirase

o marcador para que todos sepan como vai o enfrontamento.


Estade atentosporqué esta semana iremos ofrecendo mais información sobre a copa Salnés así como dos abertos que chegado Maio xerminan por toda a nosa xeografia, e dos que xa vos podemos adiantar as seguintes datas: – 9 Maio (salceda), -10 Maio (Meaño) 16 Maio (Marin) 17 Maio (por confirmar Vigo) –¿? Maio (Moaña) 30 Maio (Finais en Compostela)





Xosé Miguel gaña en Mos e Chupi proclámase campión da primeira tempada

6 04 2009

Un auditorio de luxo, tres pistas, unha tarde soleada, máis dun cento de persoas e unha rulot con música puxeron o ambiente para o último torneo da tempada 2008-2009 da LNB Sur: o II Aberto de Mos, que aquí podedes ver en fotos. Batemos a marca de participantes, con 78 palanadores e palanadoras en liza. E despexouse a gran incógnita sobre quen se proclamaría campión de liga. Ao final conseguiuno Chupi!

Chupi, primeiro campión da LNB Sur

Chupi, primeiro campión da LNB Sur

A vitoria no último torneo foi para Xosé Miguel, de Faísca. Era un dos favoritos, porque levaba unha boa tempada que só lle faltaba rematar cunha vitoria. Grazas aos 10 puntos que conseguiu ascendeu ata o terceiro posto na clasificación xeral. Pero a emoción estaba nos dous primeiros postos. A penas cinco puntos separaban a Rubén Otero de Lideiras de Chupi de Paquete Pinchas. Otero estivo a piques de quedar eliminado nos grupos previos. Á falta dunha carreira ía terceiro e só se clasificaban dous, pero ao final resolveu a papeleta e pasou de primeiro do seu grupo. A pesar diso e de facer dous varados esa tarde, Elvis botoulle un cabo a Chupi, o seu compañeiro de equipo, e eliminou a Otero en oitavos de final.

Xosé Miguel recibe o premio como gañador en Mos

Xosé Miguel recibe o premio como gañador en Mos

Con ese resultado, se Chupi chegaba a semifinais empataba no alto da clasificación. Pero o de Pontellas conseguiu incluso clasificarse para a final, co que se asegurou o triunfo definitivo na liga. Con este resultado, os oito xogadores clasificados para o Play-Off son:

1.Chupi (Paquete Pinchas): 42 puntos
2.Rubén Otero (Lideiras): 39
3.Xosé Miguel (Faísca): 31
4.Elvis (Paquete Pinchas): 26
5.Agus (Almuinha): 24
6.Alberte (Almuinha): 23
7.Pablo (Paquete Pinchas): 22
8.Amil (Paquete Pinchas): 21

En canto aos equipos, en Mos volveron triunfar Paquete Pinchas, que redondearon así unha tempada na que demostraron ter o equipo máis completo e equilibrado. Foron o mellor equipo en seis dos oito torneos e sacáronlle 45 puntos aos segundos, asegurándose xa a mediados de tempada ser o equipo que representa á Conferencia Sur nos Play-Off de Compostela. Faísca fixo un bo torneo en Mos, e coa vitoria de Xosé Miguel conseguiron os puntos suficientes para arrebatarlle a segunda posición a Almuinha.

As prazas da cuarta á sexta decidíronse por 2 puntos de diferencia, amosando a igualdade entre Moaña, Lideiras e Culombio. Treze Catorze, Assembleia Aberta, Se Foras Traballar e Branco e Negro completan a relación de dez equipos que participaron de forma regular nesta tempada. Así quedou a clasificación:

1.Paquete Pinchas: 128 puntos
2.Faísca: 83
3.Almuinha: 79
4.Moaña: 67
5.Lideiras: 66
6.Culombio: 65
7.Treze Catorze: 61
8.Assembleia Aberta: 57
9.Se Foras Traballar: 51
10. Branco e Negro: 34

Fátima, gañadora feminina en Mos

Fátima, gañadora feminina en Mos

A clasificación feminina non se moveu nas primeiras posicións tras o Aberto de Mos. Fátima de Culombio foi a gañadora do torneo, e consolidouse como a terceira muller mellor clasificada. Por diante dela quedaron Ana de Assembleia Aberta (segunda) e Chus de Se Foras Traballar, que fixo valer a súa regularidade para rematar primeira da liga. Na cuarta posición produciuse un empate entre Diana de Almuinha e Pilar de Se Foras Traballar:

1.Chus (Se Foras Traballar): 14 puntos
2.Ana (Assembleia Aberta): 12
3.Fátima (Culombio): 11
4.Diana (Almuinha): 8
4.Pilar (Se Foras Traballar): 8

No que toca á clasificación de varados, o torneo de Mos serviu para que Rubén Otero se distanciase máis do resto de xogadores. Con 9 varados esta tempada, situouse moi lonxe dos seus principais perseguidores: Fuco de Branco e Negro (5 varados) e Santi de Assembleia Aberta e Xosé Miguel de Faísca (4 varados cada un). Eles os catro estarán nos Play-Off:

1.Rubén Otero (Lideiras): 9 varados
2.Fuco (Branco e Negro): 5
3.Santi (Assembleia Aberta): 4
3.Xosé Miguel (Assembleia Aberta): 4

Rubén de Treze Catorze fixo un varado, pero non foi suficiente para clasificarse

Rubén de Treze Catorze fixo un varado, pero non foi suficiente para clasificarse

O torneo pechámolo cunha gala no que todos os equipos recolleron un galardón e na que os clasificados para o Play-Off recibiron os aplausos dos seus compañeiros e compañeiras de torneo. E logo houbo tempo para encher o bandullo cuns pinchos cortesía do Concello de Mos e de encher as orellas coa familia de ArrremecághonasProducións: O Leo de Matamá, o En-riquinho e O Leo i Arremecághona!!! Foi unha actuación gloriosa da turma d’O Leo, que uns días antes deixaba as súas impresións nunha entrevista en exclusiva para O Varal.

Así acabaron as billardas logo dunha tempada tan dura

Así acabaron as billardas logo dunha tempada tan dura

Pechamos así a tempada regular 2008-2009 da LNB Sur. Pero aínda hai máis:
– o Xerro do Salnés (Xil -Meaño-, 10 de maio),
– o Play-Off Nacional (Santiago de Compostela, 31 de maio),
– a Cunca Xíbara (con data e lugar aínda sen fixar)
e unha manchea de abertos amistosos (non podía ser doutra maneira) para o mes de maio:
– en Salceda de Caselas o 9 de maio (co formato tradicional)
– en Marín o 16 de maio
– en Moaña o 17 de maio.

Permanecede atent@s!

P.S.: Aquí vos deixamos a presentación dos resultados da LNB Sur 2008-09 que proxectamos na gala de Mos: