Xosé Miguel gaña en Mos e Chupi proclámase campión da primeira tempada

6 04 2009

Un auditorio de luxo, tres pistas, unha tarde soleada, máis dun cento de persoas e unha rulot con música puxeron o ambiente para o último torneo da tempada 2008-2009 da LNB Sur: o II Aberto de Mos, que aquí podedes ver en fotos. Batemos a marca de participantes, con 78 palanadores e palanadoras en liza. E despexouse a gran incógnita sobre quen se proclamaría campión de liga. Ao final conseguiuno Chupi!

Chupi, primeiro campión da LNB Sur

Chupi, primeiro campión da LNB Sur

A vitoria no último torneo foi para Xosé Miguel, de Faísca. Era un dos favoritos, porque levaba unha boa tempada que só lle faltaba rematar cunha vitoria. Grazas aos 10 puntos que conseguiu ascendeu ata o terceiro posto na clasificación xeral. Pero a emoción estaba nos dous primeiros postos. A penas cinco puntos separaban a Rubén Otero de Lideiras de Chupi de Paquete Pinchas. Otero estivo a piques de quedar eliminado nos grupos previos. Á falta dunha carreira ía terceiro e só se clasificaban dous, pero ao final resolveu a papeleta e pasou de primeiro do seu grupo. A pesar diso e de facer dous varados esa tarde, Elvis botoulle un cabo a Chupi, o seu compañeiro de equipo, e eliminou a Otero en oitavos de final.

Xosé Miguel recibe o premio como gañador en Mos

Xosé Miguel recibe o premio como gañador en Mos

Con ese resultado, se Chupi chegaba a semifinais empataba no alto da clasificación. Pero o de Pontellas conseguiu incluso clasificarse para a final, co que se asegurou o triunfo definitivo na liga. Con este resultado, os oito xogadores clasificados para o Play-Off son:

1.Chupi (Paquete Pinchas): 42 puntos
2.Rubén Otero (Lideiras): 39
3.Xosé Miguel (Faísca): 31
4.Elvis (Paquete Pinchas): 26
5.Agus (Almuinha): 24
6.Alberte (Almuinha): 23
7.Pablo (Paquete Pinchas): 22
8.Amil (Paquete Pinchas): 21

En canto aos equipos, en Mos volveron triunfar Paquete Pinchas, que redondearon así unha tempada na que demostraron ter o equipo máis completo e equilibrado. Foron o mellor equipo en seis dos oito torneos e sacáronlle 45 puntos aos segundos, asegurándose xa a mediados de tempada ser o equipo que representa á Conferencia Sur nos Play-Off de Compostela. Faísca fixo un bo torneo en Mos, e coa vitoria de Xosé Miguel conseguiron os puntos suficientes para arrebatarlle a segunda posición a Almuinha.

As prazas da cuarta á sexta decidíronse por 2 puntos de diferencia, amosando a igualdade entre Moaña, Lideiras e Culombio. Treze Catorze, Assembleia Aberta, Se Foras Traballar e Branco e Negro completan a relación de dez equipos que participaron de forma regular nesta tempada. Así quedou a clasificación:

1.Paquete Pinchas: 128 puntos
2.Faísca: 83
3.Almuinha: 79
4.Moaña: 67
5.Lideiras: 66
6.Culombio: 65
7.Treze Catorze: 61
8.Assembleia Aberta: 57
9.Se Foras Traballar: 51
10. Branco e Negro: 34

Fátima, gañadora feminina en Mos

Fátima, gañadora feminina en Mos

A clasificación feminina non se moveu nas primeiras posicións tras o Aberto de Mos. Fátima de Culombio foi a gañadora do torneo, e consolidouse como a terceira muller mellor clasificada. Por diante dela quedaron Ana de Assembleia Aberta (segunda) e Chus de Se Foras Traballar, que fixo valer a súa regularidade para rematar primeira da liga. Na cuarta posición produciuse un empate entre Diana de Almuinha e Pilar de Se Foras Traballar:

1.Chus (Se Foras Traballar): 14 puntos
2.Ana (Assembleia Aberta): 12
3.Fátima (Culombio): 11
4.Diana (Almuinha): 8
4.Pilar (Se Foras Traballar): 8

No que toca á clasificación de varados, o torneo de Mos serviu para que Rubén Otero se distanciase máis do resto de xogadores. Con 9 varados esta tempada, situouse moi lonxe dos seus principais perseguidores: Fuco de Branco e Negro (5 varados) e Santi de Assembleia Aberta e Xosé Miguel de Faísca (4 varados cada un). Eles os catro estarán nos Play-Off:

1.Rubén Otero (Lideiras): 9 varados
2.Fuco (Branco e Negro): 5
3.Santi (Assembleia Aberta): 4
3.Xosé Miguel (Assembleia Aberta): 4

Rubén de Treze Catorze fixo un varado, pero non foi suficiente para clasificarse

Rubén de Treze Catorze fixo un varado, pero non foi suficiente para clasificarse

O torneo pechámolo cunha gala no que todos os equipos recolleron un galardón e na que os clasificados para o Play-Off recibiron os aplausos dos seus compañeiros e compañeiras de torneo. E logo houbo tempo para encher o bandullo cuns pinchos cortesía do Concello de Mos e de encher as orellas coa familia de ArrremecághonasProducións: O Leo de Matamá, o En-riquinho e O Leo i Arremecághona!!! Foi unha actuación gloriosa da turma d’O Leo, que uns días antes deixaba as súas impresións nunha entrevista en exclusiva para O Varal.

Así acabaron as billardas logo dunha tempada tan dura

Así acabaron as billardas logo dunha tempada tan dura

Pechamos así a tempada regular 2008-2009 da LNB Sur. Pero aínda hai máis:
– o Xerro do Salnés (Xil -Meaño-, 10 de maio),
– o Play-Off Nacional (Santiago de Compostela, 31 de maio),
– a Cunca Xíbara (con data e lugar aínda sen fixar)
e unha manchea de abertos amistosos (non podía ser doutra maneira) para o mes de maio:
– en Salceda de Caselas o 9 de maio (co formato tradicional)
– en Marín o 16 de maio
– en Moaña o 17 de maio.

Permanecede atent@s!

P.S.: Aquí vos deixamos a presentación dos resultados da LNB Sur 2008-09 que proxectamos na gala de Mos:

Advertisements




Análises no ecuador (II): así vai a clasificación individual

8 01 2009

Transcorrida a metade do campionato, parece claro que Chupi dos Paquete Pinchas é o rival a bater. Venceu en dous dos catro torneos disputados e foi finalista noutro, o que o sitúan á fronte da clasificación con dez puntos sobre os seus principais perseguidores. A súa baza é a gran regularidade, de modo que case sempre resolve as súas partidas en dous ou tres golpes.

Hai un aspecto fundamental para botar as contas da clasificación: lembrade que só van puntuar os 6 mellores campionatos de cada quen, así que como quen di os xogadores teñen a posibilidade de fallar dúas veces.

Os seguintes na clasificación son Agus de Almuinha e Rubén de Lideiras, con 22 puntos. Se ben non tan regulares como Chupi, amosaron en varias ocasións a súa capacidade competitiva e a súa destreza. Agus non acostuma fallar e Rubén ten unha gran potencia de lanzamento. Hoxe por hoxe parecen os dous únicos en condicións de alcanzar a Chupi.

Por detrás hai un bo número de xogadores que amosaron boas maneiras. A clasificación aprétase por debaixo dos 15 puntos de Aníbal dos Paquete Pinchas. Elvis e Charlie do mesmo equipo e Pinto de Faísca suman 13, Abrám de Assembleia Aberta e Pablo de Culombio chegan aos 11, e Fuco (Branco e Negro), Manu (Faísca), Santiago e Ana (Assembleia Aberta) teñen 10, e hai moitos xogadores con 9, 8, 7 puntos… A lista de xogadores aspirantes a rematar entre os oito primeiros é ampla e nese aspecto a liga está aberta a todo tipo de sorpresas. Polo seu rendemento nalgúns campionatos hai que ter moi en conta a Xosé Miguel (Faísca), Panzo, David e Chuki (Moaña), Amil (Paquete Pinchas), etc. E hai xogadores que aínda non destacaron na liga pero si fixeron bos campionatos na pretemporada: Alberte (Almuinha), Santi (Culombio), Josué…

En total, máis de 120 xogadores e xogadoras participaron por agora na LNB Sur, dos cales 65 fixérono en máis dunha ocasión e contan xa como fixos da liga. E con catro torneos por diante, todos e todas terán a súa oportunidade de se clasificaren.

Lembrade que a LNB Sur só terá un campión… pero os oito primeiros clasificados participarán no Play-Off final, enfrontándose aos mellores do noroeste e o nordeste, e de aí sairá o campión absoluto da Liga Nacional de Billarda.





Análises no ecuador (I): como van os equipos

7 01 2009

Pasado o ecuador da LNB Sur, é hora de analizar as clasificacións para afrontar preparados esta segunda quenda de torneos de aquí a abril. Comezamos pois coa analise da clasificación por equipos.

Logo das dúas primeiras xornadas nas que se foron incorporando e desaparecendo varios equipos, desde a xornada terceira contamos cun número estable de dez equipos que participan constantemente nos torneos.

O mellor equipo será o campión da LNB Sur e participará nos play-offs para enfrontarse aos mellores das ligas Noroeste e o Nordeste. Ese posto correspóndelle por agora aos líderes indiscutibles, os Paquete Pinchas. O conxunto con base en Pontellas (O Porriño) acumula tres vitorias en catro torneos, e cos seus 80 puntos, lévalle 30 ao seguinte na táboa. O segredo: unha figura como Chupi e un conxunto extremadamente regular no que sempre hai outros catro ou cinco xogadores que conseguen boas puntuacións: Aníbal, Elvis, Charlie, Pablo, Amil… Non hai que esquecer que este equipo ten catro xogadores entre os oito mellores da clasificación individual.

Séguelle na táboa Almuinha. Os de Marín obtiveron nos dous primeiro campionatos moi bos rexistros e situáronse moi cerca dos Paquete Pinchas, pero nos torneos de Marín e Ponteareas non estiveron tan finos. A súa liña descendente é inversamente proporcional á liña ascendente que marcan Faísca, os seguintes na táboa só cun punto menos. Se ben comezaron bastante frouxos, nas últimas xornadas os de Vigo amosaron unha sorprendente progresión, que os levou a gañar o último torneo, disputado en Ponteareas. Agora tócalles xogar en casa, algo que polo que parece non senta ben aos equipos.

E se non que llo pregunte a Assembleia Aberta, que sofren unha pequena caída nos resultados, similar á de Almuinha. O resultado disto é que perderon un posto na última xornada e agora teñen que defender cos seus 44 puntos a terceira posición diante de Lideiras e Culombio. Lideiras suma 38 e ten como principal problema unha excesiva dependencia do seu mellor palanador: Rubén conseguiu case 2/3 deses puntos. Culombio leva 35 puntos. Logo dun inicio de tempada frustrante parece que as cousas lle van mellor nas últimas xornadas, e aspiran a seguir mellorando.

Por detrás quedan catro equipos que só xogaron tres xornadas, e a pesar diso están en condicións de subir postos e situarse máis arriba na clasificación. Moaña, Se Foras Traballar e Treze Catorze amosan bos resultados, e nos tres casos dan a impresión de que poden dar moito máis de si e que nalgún torneo dos que faltan van dar a sorpresa. Branco e Negro presenta unha liña moi irregular polos poucos xogadores que presenta en cada torneo, pero pode ter a súa oportunidade se subsana este problema.

Por debaixo do primeiro posto a clasificación está moi aberta, máis se temos en conta que só puntuarán os seis mellores resultados de cada equipo. Todo pode ocorrer!





Os Paquete Pinchas arrasan en Marín

17 11 2008

Os Paquete Pinchas arrasaron no Torneo de Marín desta fin de semana. Chegaron dispostos a levalo todo e conseguírono: campión e finalista individual, mellor equipo, xogador con máis varados e liderato nas clasificacións individual e por equipos. Tras a celebración das tres primeiras xornadas aparecen claramente como os rivais a bater… e seguro que o resto de equipos o terán moi en conta de cara a vindeiros torneos. Tremede Paquete Pinchas, que vos temos de ollo!

En Marín a equipa local aspiraba a darlle continuidade ao bo estado de forma que demostraran nas citas anteriores. Pero o esforzo organizativo para montar un torneo estupendo en todos os aspectos pasoulles factura á hora de competir. Só Agus puido asomar a cabeza nunhas semifinais copadas polos Paquete Pinchas. E é que os de Pontellas conseguiron colocar un dos seus en cada unha das eliminatorias de cuartos… e gañaron tres!

Venceu Chupi de novo

Na primeira das semifinais xogaron os ata entón co-líderes, Chupi e Agus, que se xogaban o liderato. Venceu Chupi, que ao pasar á final asegurábase permanecer líder no mes de novembro. O seu rival ía saír dunha semifinal fraticida entre Charlie e Elvis. E aínda que o primeiro colocou a billarda a escasos metros do varal no primeiro golpe, Elvis enganchou un varado espectacular que o lanzou directo á final. Era o segundo varado da xornada, o que o confirmou como xogador revelación do torneo e campión de varados do día. Na final Elvis non puido consumar a sorpresa, e caeu diante da regularidade case matemática de Chupi, que volveu triunfar coa súa sucesión de carreiras case perfectas nas que consegue marcar sempre en dous ou tres golpes.

62 palanadores

Os demais equipos quedaron ensombrecidos pola racha dos Paquete Pinchas. Tanto é así que fronte aos 28 puntos do equipo líder, Almuinha, Faísca e Culombio chegaron só aos 11 puntos, e o resto das franquicias quedaron por debaixo desa marca. En total, no Colexio da Laxe presentáronse 62 palanadores de 10 equipos, as escuadras que van protagonizar esta LNB Sur ata o final da tempadas.

Clasificacións (podedes consultalas completas nesta ligazón)

A clasificación individual está agora encabezada en solitario por Chupi (Paquete Pinchas) con 24 puntos, catro máis que o seu máis inmediato perseguidor, Agus (Almuinha). Por detrás veñen Rubén (Lideiras) con 16, Aníbal (Paquete Pinchas) con 15 e aparece xa con 11 en quinta posición Elvis (Paquete Pinchas).

Ana de Asemblea Aberta segue sendo a primeira na clasificación feminina con 8 puntos, pero logo dunha xornada na que non estivo afortunada ve como se lle achega Chus de Se Foras Traballar, que con moita regularidade acumula 6 puntos en dúas xornadas.

Por equipos, Paquete Pinchas son máis líderes que nunca cos seus 64 puntos, cunha ampla vantaxe sobre Almuinha, que ten 41. A partir de aí as cousas están apretadas, nun pelotón nos que se atopan Asemblea Aberta (34 puntos), Lideiras (29), Faísca (28), Culombio (24), Se Foras Traballar (20), Moaña (18), Branco e Negro (18) e Treze Catorze (17).

Nos varados, o liderato segue en mans de Fuco (Branco e Negro), que logrou este sábado outro varado máis e conta xa con 3. Séguenlle Santiago de Asemblea Aberta e Elvis de Paquete Pincha, con 2 varados cada un.

Como sempre, podedes ver no Foto-Varal as fotos do torneo. E estade atentos os próximos días á aparición do vídeo. E quen sabe se tamén poderemos ver as fotos da nova enchenta de Paquete Pinchas, esta vez a base de bacallau e lacón…





A billarda cheiraba a mar

20 10 2008

En Moaña a billarda cheiraba a mar, e houbemos perder as nosas no fondo da ría! Pode que por iso a xente non se animase a soltar demasiado o brazo, e non houbo quen conseguise facer un varado. E non foi por falta de candidatos. No Morrazo presentáronse 72 xogadores que bateron un novo récord de asistencia na Conferencia Sur da LNB, e crearon dores de cabeza par conseguir argallar uns cadros para desenvolver o campionato. “Eu pensaba que chegariamos a cen participantes”, dicía Xosé Miguel, anfitrión do torneo.

O ambiente na pista de xogo, detrás da praza de Abastos, era inmellorable. Entre os xogadores e o público xuntouse un bo feixe de persoas arrredor dun campionato que non decepcionou. Fixeron falta case catro horas de xogo e uns cantos focos para coñecer o gañador. A semifinais chegaron por un lado do cadro Ana de Asemblea Aberta e Agus de Almuinha e polo outro Xosé Miguel de Faísca e Rubén de Lideiras.

Ana deu a sorpresa solventando eliminatorias con moita seguridade, e a piques estivo de acadar a final. Os 6 puntos de Moaña sérvenlle para situarse claramente como a palanadora feminina mellor clasificada. E Xosé Miguel caeu na casa ás portas da final, quizais lastrado polo exceso de traballo ao longo das últimas semanas para organizar a macrofesta da billarda en Moaña. Así que a final xogárona Agus e Rubén, nun lance emocionante no que o público arroupou aos xogadores, rodeándoos nos últimos golpes a escasos metros do varal. Ao final foi Rubén o que se levou o pato a auga, ou mellor dito, os mexillóns ao papo.

En Moaña resentáronse máis equipas que nunca, en total once. Seis repetían, pero houbo tamén cinco franquicias novas ás que lle demos a benvida: Se Foses Traballar, Treze Catorze, Moaña, Por Vir e A Revolta. Agardemos que boa parte deles continúen nos seguintes torneos, porque amosaron que veñen dispostos a dar guerra. Á hora de decidir a mellor equipa do torneo a cousa estivo moi igualada. Os debutantes Se Foses Traballar conseguiron 12 puntos, un menos que Lideiras, que obtivo 13. En cabeza houbo unha triple empate entre Paquete Pinchas, Asemblea Aberta e Almuinha, con 14 puntos. Cada equipo escolleu a súa figura no torneo para xogarse o desempate á billarda máis longa, e un golpe potente de Chupi serviulle para ofrecer un saco de mexillóns aos seus, os Paquete Pinchas.

Así rematou a festa… ou case. Á noite seguinte, os Paquete Pinchas e Rubén reuníronse para dar boa conta dos mexillóns. Os Paquete van de enchenta en enchenta (primeiro callos e xamón, agora mexillóns), ao mellor gañan uns quilos que lle dan aos demais equipos a opción de meterlles o dente e triunfar nos seguintes campionatos.

En canto ás clasificacións, na individual hai un empate na cima entre Agus e Chupi, seguidos a só dous puntos por Aníbal e Rubén Otero. Os xogadores de Almuinha, Asemblea Aberta e Paquete Pinchas copan as doce primeiras posicións, coas excepcións de Rubén de Lideiras e Xosé Miguel de Faísca. É por iso que esas tres franquicias son tamén os que mandan na clasificación por equipos: 36 puntos para Paquete Pinchas, 30 para Almuinha e 27 para Asemblea Aberta.

Esta semana houbo tamén liga no Noroeste e no Norleste. E xa se van vendo os rivais máis potentes de cara aos play-offs.

( Por certo, podedes ver as fotos do torneo en Foto Varal).





Rubén e os Paquete Pinchas, enchenta de mexillóns

19 10 2008

O Torneo de Moaña bateu un record de participación na LNB Sur: nada menos que 72 participantes nun torneo intenso que se prolongou ata tan tarde que houbo que prender a iluminación artificial. E baixo a luz dos focos triunfou Rubén Otero, o líder dos Lideiras, que se impuxo na final a Agus, de Almuinha. Pero este acadou unha boa recompensa, xa que con 14 puntos alcanza a Chupi no máis alto da clasificación individual.

O torneo de onte estivo tan igualado que tres equipos empataron como os mellores con 14 puntos: Paquete Pinchas, Almiinha e Asemblea Aberta. Para dilucidar cal foi o mellor, xogouse á billarda máis longa, e Paquete Pinchas volveron triunfar. Seguen no alto da clasificación, pero Almuinha e Asemblea Aberta séguenos de preto.

Os gañadores recibiron os seus trofeos e uns bos sacos de mexillóns. Rumoréase nos mentideiros da billarda que esta noite vai haber unha gran mexilloada en Mos na que Rubén e os Paquete Pinchas van dar boa conta dos seus premios.

Podedes consultar as clasificacións nesta páxina. Os puntos totais aparecen en negriña, ao lado o número de xornadas desputadas e nas seguintes columnas os puntos conseguidos no 1º e 2º torneo. A pista de Moaña resistiuse aos especialistas en varados, así que a clasificación de varados non se moveu.

Pronto teremos no blog a crónica do torneo, as fotos e os vídeos. Estade atentos!