Achégase a super-finde billardeira: Aberto de Salceda e All Stars en Ourense

27 02 2009

En Budiño vivimos un dos máis impactantes abertos da tempada, do que dá boa mostra esta nova superprodución:

Deu moito de si, calidade no xogo e bo ambiente na cancha, pero agora hai que mirar para adiante e xa está aí cerquiña a gran super-finde billardeira. O sábado 7 de marzo Salceda de Caselas acollerá a 7ª xornada da LNB Sur, organizado pola xente da Asociación Treze Catorze. E o domingo 8, todos ao interior a participar no Billarda All Stars Ourense’09.  Alí xuntarémonos todas as estrelas da billarda chegadas desde os catro puntos cardinais do país para amosar as nosas destrezas.

O All Stars contará cun aberto, un torneo de mates e outro de triples. Preparade as vosas xogadas mestras para lucilas na pista de chave, ao lado do estadio do Couto. Pola semana daremos información máis detallada do desenvolvemento do All Stars.

Advertisements




Rubén Otero gaña en Budiño e xa é lider da LNB Sur

17 02 2009

En Budiño fixo un sol radiante. A tarde prestábase para estar fóra e tivemos a xornada climatoloxicamente máis placenteira da temporada. A xente da Forna e os Paquete Pinchas prepararon o terreo de xogo no torreiro da festa de San Brais, que transcorrera a penas tres días antes e da que aínda quedaba algún recordo, como o cartel de “12 tiros, 3 euros”. Como reminiscencia festiva, Fuco fixo de speaker e animou o campionato cos seu estilo de narrador clásico, todo un Joaquín Prats contemporáneo.

Xogamos en dúas pistas de terra, longas, costentas e duras. Terreo pouco propicio para varados (só os conseguiron Santi de Assemblea Aberta e Luís Enrique de Almuinha, dous especialistas). Terreo para partidas longas, no que lle foi moi ben aos que en vez de golpes fortes e baixos practican un xogo constante, de golpes a media distancia e regularidade.

A participación foi de novo altísima: 71 palanadores dos 10 equipos regulares da liga, cunha abrumadora presenza dos de Treze Catorze, que están preparando novos xogadores para o seguinte torneo, que xogan en casa. Serán o primeiro equipo que triunfe na súa casa? Porque este sábado tocoulle aos Paquete Pinchas pinchar como caseiros: só 10 puntos, a súa peor participación. En cambio foi un bo día para Faísca, que se levaron o premio ao mellor equipo do torneo e colocaron a un dos seus na final: Suso Diz, que de paso sube na clasificación ata o 7º posto.

A final arrebatoulla o que está demostrando ser máis regular, Rubén Otero. Parece que se adapta ben a todas as pistas, pero ten predilección polas longas e difíciles. Aínda que segue líder de varados, é precisamente nas canchas nas que non consegue facer varados onde logra gañar os torneos (Moaña e Budiño). Coa súa segunda vitoria álzase ao primeiro posto da clasificación, superando a Chupi, que acusa un baixón de xogo e resultados.

Botádelle un ollo ás clasificacións. Na individual, os que ocupan postos play-off neste momento son Rubén, Chupi, Agus, Elvis, Pablo Álvarez, Santi Mendes, Pinto, Suso Diz e Amil. Pero aínda hai unha recua de palanadores con posibilidades, algúns en clara liña ascendente como Jurjo, Arosa, Alberte e Chiwi, que completaron un excelente torneo en Budiño.

Outra xogadora que brillou a gran nivel na última xornada foi Chus, que cos tres puntos conseguidos sitúase como primeira clasificada feminina. Parabéns tamén a Alberte e Diana, de Almuinha, que golpe a golpe gañaron o premio reservado en Budiño á mellor parella da xornada, aproveitando a coincidencia co 14F, día do innombrable S. V.

Todas as fotos do torneo en Fotovaral.





14F: Budiño prepárase para o entroido a golpe de palán

11 02 2009

(CARTEL DE PRESENTACI323N.cdr)

Logo da intensa xornada de aberto o domingo pasado en Santiago, volve a liga á LNB Sur coa sexta xornada de liga, desta volta en Budiño. A Asociación Cultural A Forna organiza un torneo que se disputará este sábado 14 de febreiro a partir das 16 horas na pista de futbito da Forna. Parece que desta vez o tempo vai acompañar e poderemos xogar ao aire libre. Se chove, a cita será no pavillón do Colexio Público Cruz-Budiño. Cos estupendos planos que preparou Amil non vos perderedes:

A FORNA.cdr

a-forna-03

A xornada promete ser apaixonante. A clasificación está aínda moi aberta, e se ben parece que son poucos os que están en condicións de loitar polo primeiro posto da liga, o abano de palanadores e palanadoras en disposición de clasificarse para os play-offs é moi grande.

Lembrade que nos play-offs xogarán os mellores das tres conferencias para obter o título de campión absoluto da Liga Nacional de Billarda. Para clasificarse hai que rematar entre os oito primeiros da liga, posto que agora comparten Pinto e Charlie. Pero o campión de cada torneo obtén 10 puntos, e hai case medio cento de xogadores e xogadoras que se atopan a 10 puntos ou menos do oitavo posto. A clasificación está moi aberta e pode dar moitas voltas, confiade nas vosas posibilidades!

E para animarvos a empregarvos a fondo en Budiño, a A.C. A Forna preparou uns premios suculentos, propios do entroido que xa chega. Seguindo a tradición culinaria dos trofeos da LNB, os galardóns serán a base de pezas para facer un bo cocido e pan do Porriño. Hai premios reservados para o campión e o subcampión, o mellor equipo, a muller mellor clasificada, e (dado que o torneo cae en 14 de febreiro) un premio á mellor parella.

Vémonos en Budiño!





Este domingo, aberto solidario con Palestina

5 02 2009

cartaz-solidaridade-con-palestina