Lemos rompe o maleficio do organizador no aberto con máis varados

1 12 2009
  • O dos Pincharango venceu a Chupi cun varado nunha tarde na que se conseguiron 16
  • Pauliña convertiuse na primeira xogadora en facer un varado, e Ana Diz e Lorena tamén conseguiron os seus
  • Os Paquete Pinchas volven gañar e mantñense na cabeza da clasificación
  • No pavillón de Salceda as pinchas bailaron a ritmo de pimba e Sarri Sarri

Que máis dá que chova cando á sombra dun pavillón tan xeitoso como o de Salceda se pode xogar a seco e sen mollarse! Ás billardas gustoulles o terreo no que se desputou o aberto organizado polos de Pincharango, e demostrárono esvarando con soltura por unha pista rápida e propicia para saídas de campo… e varados!

Unha pista de luxo, un campión sen melenas

Caeron nada máis e nada menos que 16. Tres xogadores fixérono por partida doble: Luís Enrique (Almuinha), Darío (Pincharango) e Pinto (Faísca). E as mulleres demostraron o altísimo nivel que están acadando esta tempada cos primeiros varados con selo feminino na LNB Sur: o primeiro foi de Pauliña (Treze Catorze), á que seguiron a súa compañeira Lorena e Ana Diz (Faísca).

As tres raíñas dos varados: Ana Diz, Pauliña e Lorena

As tres raíñas dos varados: Ana Diz, Pauliña e Lorena

En total, en Salceda participaron 74 palanadores. Houbo ausencias destacadas dalgúns dos favoritos, como Otero, Xosé Miguel, Tiago e Alberte, pero os que estiveron demostraron un nivel altísimo. Os Treze Catorze meteron un feixe de palanadores en dezaseisavos, pero todos caeron axiña. A Ghudalla amosou ter varias bazas boas: Panzo meteuse en cuartos e subiu outro pouco na xeral (xa é 4º), mentres Arosa se desquitou de tres torneos horribles; foi o primeiro en chegar a Salceda e a base de entrenamento colouse nas semifinais. Con 20 puntos, o equipo de Moaña quedou a un só do mellor equipo do torneo, que volveron ser Paquete Pinchas.

Arosa, o coloso da Ghudalla

A un paso das semis quedou Celso, que este sábado liderou os Lideiras. Na xogada máis polémica do partido (e do que vai de tempada), un golpe seu pegou nun dos paus do varal e o comité arbitral tivo que decidir se o fixo por dentro ou por fóra. Ao final resolveuse que por fóra, ante o disgusto do xogador.

O reporteiro Fuco entrevista a Celso logo da xogada da polémica

Celso perdeu ante Lemos, dos Pincharango, que despois de quedar terceiro no seu grupo foi mellorando de xogo ao longo das eliminatorias e acabou por chegar en plena forma a semifinais, onde eliminou a Arosa. Polo outro lado do cadro chegaron dous Paquetes, Amil e Chupi. O ninja de Pontellas, non perdeu puntería a pesar de que cortou o pelo, e deixou fóra ao seu compañeiro de equipo. Amil acabaría terceiro e consolídase nesa mesma praza na clasificación.

Veteranía no sur: Pepe, Celso, Mucha e Sita

Á gran final Lemos chegou cheo de moral e reventou todos os prognósticos: non só gañou por primeira vez un xogador do equipo organizador, senón que o fixo ao grande: cun varado. O pavillón case cae da emoción!

Espectación no golpe que lle deu a vitoria a Lemos

Pero realmente impresionante foi comprobar o altísimo nivel que están a acadar as palanadoras, e non só a base de varados. Lorena de Treze Catorze quedou co premio á mellor muller do torneo, ao caer en cuartos diante do campión e líder do campionato: Chupi. O sábado tamén pasaron de rolda Fátima, Ana Diz, Pauliña e María da Ghudalla. Elas as cinco parecen as máis fortes desta tempada, pero non poden perder de vista a outras xogadoras que apuntan maneiras, como Lara da Ghudalla ou as veteranas Sita dos Roxos e Mucha de Lideiras, ademais de dúas das mellores do ano pasado que este ano aínda non atoparon o seu xogo: Chus de Se Foras Traballar e Ana dos Currichos.

Foto de familia de Pincharango: gran organización, gran resultado

E do torneo quedámonos tamén coa animación do público, que non perdeu nin un golpe das dúas pistas mentres palmeaba e bailaba ao ritmo da selección musical de Dj Gil. Para recrear o ambiente, que mellor que lembrar dúas das cancións máis coreadas polo graderío este sábado: o pimba de Quim Barreiros na garagem da vizinha, e o rock vasco de Kortatu celebrando a fuga de Sarri. Música!

Advertisements




Asalto ao liderato en Salceda!

26 11 2009

Xa deixamos atrás tres xornadas da liga e a clasificación mantense moi igualada. En Salceda palanadores como Luis Enrique, Amil ou Davide, entre os máis regulares do que vai de tempada, tentarán quitarlle a primeira praza a Chupi, que conta cunha marxe escasa de puntos. Por equipos, este ano seguen a dominar os Paquete Pinchas, pero non o fan coa suficiencia do ano pasado porque o resto dos conxuntos están mellor armados que nunca: Almuinha ou os locais Pincharango non se atopan demasiado lonxe do liderato.

A cita é este sábado ás 16 horas no pavillón de Salceda de Caselas, organizado por Pincharango. Meteogalicia prognostica ameaza chuvia: de ser ese o caso, xogaremos no pavillón. Se non chove, xogaremos mentres o día aguante nas pistas de terra que hai fóra.





Vídeo-inmersión no Aberto de Salceda

30 03 2009

Estamos na semana decisiva da LNB Sur. Faltan só 5 días para que todo se decida. Para afrouxar a tensión que se respira no ambiente, hoxe ofrecémosvos o último vídeo-estalo do TeleVaral: o do Aberto de Salceda. E ao igual que xornada a xornada medra o nivel dos xogadores, tamén de cada vez contamos con vídeos máis completos, propostas máis arriscadas para transformar en imaxe e música as vibracións das billardas e os paláns.

Nesta ocasión temos un vídeoclip experimental, no que Pablo Suengas nos transporta con sons electrónicos  e imaxes desestruturadas ao territorio da billarda, emulando a grandes como Michel Gondry ou Chis Cunningham.

Para cando a LNB na MTV?





Alberte gaña o penúltimo asalto

9 03 2009

O sétimo e penúltimo aberto da primeira tempada da LNB Sur foi un torneo duro por xogarse nun terreo brando, o do campo de fútbol sete situado ao carón do pavillón de Salceda. Foron necesarios esforzos extraordinarios para erguer as billardas, que se enterraban no terreo. Pero isto, lonxe de ser un impedimento para o espectáculo, deulle emoción e vistosidade ao torneo, e permitiu que algúns xogadores se descubriran como especialistas en terreos difíciles. Ao final, Alberte de Almuinha venceu a Iván dos Paquete Pinchas. Estes volveron gañar como mellor equipo, e Pauliña de Treze Catorze foi a mellor palanadora da xornada.

Iván e Alberte, os finalistas

Iván e Alberte, os finalistas

Un total de 67 palanadores e palanadoras participaron no torneo. Por primeira vez xogamos con tres pistas á vez, co que conseguimos reducir os tempos mortos. Iso si, os que xogaron na pista esquerda tiveron que sufrir máis que ningún os charcos do terreo. Alberte forxou a súa vitoria nunha envexable regularidade. Polo camiño deixou a Rubén Otero de Lideiras (oitavos), Santi de Culombio (cuartos) e Xosé Miguel de Faísca (semis). Con eses vimbios chantouse na final contra Iván. Na súa segunda participación, o dos Paquete Pinchas clasificouse logo de eliminar a Santi de Assembleia Aberta (oitavos), David de Culombio (cuartos) e Manuel de Se Foras Traballar (semis). Foi unha final inédita na que se notaron os nervios en ambos. Logo dunha serie de golpes desafortunados, os dous introduciron a pincha no varal no mesmo número de toques. Na carreira do desempate, Alberte estivo máis fino.

O público arroupa aos palanadores na apretada final

O público arroupa aos palanadores na apretada final

Os 10 puntos de Alberte serviron para elevar a 15 os de Almuinha, salvando unha xornada na que tamén fixo un bo papel Luís Enrique (oitavos). Alberte ascendeu ata o cuarto posto da clasificación individual, xusto por detrás de Agus. E Almuinha consolidouse como segundo equipo en solitario na clasificación. Superan así a Faísca, que tiveron unha mala xornada na que só brillou Xosé Miguel, que chegou a semifinais e ademais conseguiu dous varados e suma xa catro na clasificación de varados. Achégase así algo máis a Rubén Otero, que sumou outro para deixar o seu contador en sete no que vai de liga.

Alberte recibe o premio do artesán-artista que creou a 13-14 de madeira

Alberte recibe o premio do artesán-artista que creou a 13-14 de madeira

Para os Paquete Pinchas quedou a honra do premio ao mellor equipo, grazas ao gran papel de Iván e á contribución de Amil (cuartos) e Pablo e Álvaro (oitavos). Con 122 puntos na xeral, teñen xa asegurado o premio ao mellor equipo desta LNB Sur, conseguido grazas á gran variedade de xogadores de bo nivel, que conseguen boas posicións torneo tras torneo.

Paquete Pinchas, men in black, veteranos nisto de recoller premios

Paquete Pinchas, "men in black", veteranos nisto de recoller premios

O outro equipo destacado da xornada foi Culombio, que meteu a tres dos seus en cuartos: Santi, Moi e David. O equipo sumou 15 puntos e subiu dúas posicións na clasificación, ata a quinta praza actual. Sitúase detrás de Lideiras nunha melé de cinco franquías que loitan por acabar na cuarta posición. Culombio aproveitou a mala xornada que tiveron Lideiras, Moaña, Assembleia Aberta e Treze Catorze. Algo mellor lles foi a Se Foras Traballar, nos que destacou a espectacular participación de Manuel, que estivo a punto de facerse cunha praza na final. Salceda foi o escenario do regreso á competición do equipo da Revolta. Esperamos que repitan e se consoliden para o ano vindeiro.

Outra novidade do torneo de Salceda é que parece que os Treze Catorze conseguiron superar en parte a maldición que persegue ao equipo organizador de cada torneo. Colocaron sete xogadores en dezaseisavos, pero ningún pasou desa rolda. Pero Pauliña alzouse co trofeo á mellor xogadora da xornada, para o que tivo que librar unha final de desempate con Chus de Se Foras Traballar. Por fin un trofeo quedou na casa.

David entrega o premio a Pauliña: todo queda en casa

David entrega o premio a Pauliña: todo queda en casa

Pero non só iso levaron os da asociación Treze Catorze. Tamén o recoñecemento pola boa organización do torneo, o éxito do emprazamento, da xente que pasou por alí e de atopar unha chave do 13-14 (toda unha rareza) para premiar ao mellor equipo. E quedamos impresionados cos preciosos trofeos elaborados polo pai de David para premiar aos outros gañadores da xornada. Chapeau!

Viño, callos da casa e pezas únicas para premiar aos mellores

Viño, callos da casa e pezas únicas para premiar aos mellores

A seguinte cita será a última desta tempada: en Mos o 4 de abril. Alí teremos o último aberto e entregaremos os premios finais desta primeira tempada da LNB Sur. Alí saberemos quen é o gañador individual, se Rubén Otero ou Chupi, os dous que contan con opcións. Saberemos que oito palanadores se clasifican para os play-off finais en Compostela. Coñeceremos tamén a gañadora á mellor muller, onde Chus de Se Foras Traballar e Ana de Assembleia Aberta se perfilan como favoritas. E aplaudiremos tamén ao mellor equipo e ao campión de varados.

Atentos a este blog: irémosvos informando dese último torneo e analizaremos a fondo como se atopan neste momento as clasificacións. Por agora, deixámosvos coas fotos do Aberto de Salceda.

P.S.: O domingo no All Stars de Ourense o poderío do sur deixouse ver. Aínda que no aberto non triunfamos, Chupi incrementou o seu prestixio facéndose á vez cos títulos do concurso de mates e o de triples. Enchenta de pezuñas e rabos de porco. Podes ver a epatante crónica do All Stars na web do Varal, e as fotos no Foto Varal.





As citas desta semana

4 03 2009

1ª cita:
Aberto de Salceda de Caselas (7ª xornada da LNB Sur)
sábado 7 de marzo ás 16.00 h
no campo detrás do pavillón de Salceda (se chove, no pavillón).
Premios a base de callos e viño.
Salceda estará sinalizada para que ninguén se perda de camiño ao pavillón.
cartel20pincha1

2ª cita:
All Stars 2009 de Ourense
Aberto, campionato de mates e campionato de triples
domingo 8 de marzo ás 12.00 h
no campo de chave xunto ao estadio do Couto.
Premios: cachucha de porco para @ vencedor/a do aberto, uñas de porco para @ gañador/a dos mates e rabos de porco para @ gañador/a dos triples.

Cartel da xornada organizada por Siareiros, na que se encadra o All Stars

Cartel da xornada organizada por Siareiros, na que se encadra o All Stars

Atención! buses para acudir a Ourense:
Sairá ás 9.45 h de Vigo (praza dos cabalos), coas seguintes paradas:
– 10 h Sanguiñeda (Eroski)
– 10.10 h Ponteareas (primeira rotonda)
(Estamos estudando que o bus saia antes de Marín).
A volta será ás 19.30 h desde Ourense, parando nos mesmos lugares que na ida.
Está programada unha comida en Ourense a base de cocido (non podía ser doutro xeito) ás 14.45 h.

E se pensábades que na nosa sección de vídeos nos esquecéramos do Aberto de Vigo… aquí o tedes (máis vale tarde que nunca!).





Achégase a super-finde billardeira: Aberto de Salceda e All Stars en Ourense

27 02 2009

En Budiño vivimos un dos máis impactantes abertos da tempada, do que dá boa mostra esta nova superprodución:

Deu moito de si, calidade no xogo e bo ambiente na cancha, pero agora hai que mirar para adiante e xa está aí cerquiña a gran super-finde billardeira. O sábado 7 de marzo Salceda de Caselas acollerá a 7ª xornada da LNB Sur, organizado pola xente da Asociación Treze Catorze. E o domingo 8, todos ao interior a participar no Billarda All Stars Ourense’09.  Alí xuntarémonos todas as estrelas da billarda chegadas desde os catro puntos cardinais do país para amosar as nosas destrezas.

O All Stars contará cun aberto, un torneo de mates e outro de triples. Preparade as vosas xogadas mestras para lucilas na pista de chave, ao lado do estadio do Couto. Pola semana daremos información máis detallada do desenvolvemento do All Stars.