Este sábado na Coruña: as estrelas do deporte galego!

24 12 2008




Aberto da Auténtica

22 12 2008

cartaz-aberto-autentica-g1

O luns 10 de xaneiro comprobaremos en Vigo que palanadores e palanadoras se deixaron levar máis polos excesos neste tempo de enchentas e cheas que vén por diante. Como referente para medir o rendemento no próximo torneo, o cineasta oficial da LNB Sur (Rubén prefire que non digamos o seu nome) ofrécenos a súa última produción: “Chuzos de punta”, resumo da que caeu en Ponteareas.

A de Vigo será a seguinte cita da liga regular da LNB Sur, pero antes temos un encontro de altura: O Aberto da Auténtica!Este sábado 27 de decembro a Selección Galega de fútbol enfróntase a Irán en Riazor. E antes as rúas da Coruña acollerán un aberto que se promete espectácular, con estrelas da billarda chegadas desde todas as esquinas de Galicia para xogar nas proximidades do estadio. Os do sur tamén estaremos alí, poñédevos a punto: afiade as billardas, estirade os brazos e preparádevos para triunfar nun torneo que comezará ás catro da tarde.

Siareiros Galegos vai poñer un autobús para ir alá, ao prezo de 5 euros para o bus e 7 para o carné de socio de Siareiros, con regalo da entrada para as seleccións masculina e feminina e outros partidos profesionais. E desde a LNB, a Assembleia Aberta Baiuca Vermelha está tratando de levar outro autobús nas mesmas condicións. Se queres asistir en bus, ponte en contacto canto antes con eles en aabaiucavermelha@gmail.com.

Algúns equipos están entrenando duramente para esta cita. Aquí temos un exemplo: Culombio, unha franquicia que camiña pola metade da táboa, aproveitou a mañá do domingo para practicar un pouco e sobre todo facer medrar o espírito de equipo. E que mellor lugar para entrenar que a parroquia do núcleo dos Paquete Pinchas… a ver se se lles pega algo!

pic_0017

Animamos ao resto de equipos a que nos envíen fotos dos seus entrenamentos, celebracións, etc. Queremos vervos a todos no blog da LNB Sur.





Sorpesa en Ponteareas: Pinto e Faísca vencedores

14 12 2008

Na cuarta xornada saltou a sorpresa en Ponteareas. Os de Faísca de Vigo chegaron dispostos a plantarlle cara a Paquete Pinchas e conseguiron doble premio: impuxéronse con autoridade como mellor equipo e un dos seus, Pinto, deixou a todos coa boca aberta ao vencer a Chupi na final do segundo torneo que desputaba.

Pinto, o gañador en Ponteareas. (A imaxe é de arquivo, tomada en Marin)

Pinto, o gañador en Ponteareas. (A imaxe é de arquivo, tomada en Marín)

O sábado pola mañá en Ponteareas non había onde aparcar, uns din que pola feira, outros que polo torneo de billarda, correspondente á cuarta xornada da LNB Sur. O pavillón do parque das Monxas deunos refuxio nun día húmido, no que non fixeron acto de presenza as tales relixiosas pero si unha tromba de auga que retumbou na chapa do pavillón como se milleiros de billardas fosen golpeadas a un tempo.

Dentro practicaban 56 palanadores dos 10 equipos que regularmente están participando nesta liga. Examinaban unha pista lisa, estreita e bastante curta, que logo se revelaría como idónea para marcar varados. Xogamos a xornada partida, polo que a mañá foi o turno para os partidos dos grupos, que desputamos a dúas canchas. Da mañá quedámonos co inicio intimidador de Chupi, con dous varados consecutivos, aos que desde a pista do lado respondeu Santi de Culombio con outros dous. Máis xentes sumouse á festa dos varados, entre eles Fuco, que demostrou como se pode render a altísimo nivel aínda con muletas e unha lesión de menisco.

A mañá deixou como resultado 32 clasificados para dezaseisavos, rolda na que todos os equipos estiveron representados. Pero o inicio das partidas eliminatorias tivo que agardar ata a tarde. No medio un cocido no local social Baiuca Vermelha esperaba aos xogadores. Cocido, viño, café, licor café… algún destes ingredientes (ou a mestura de todos) fixo efecto en varios xogadores que á tarde variaron o seu rendemento, nuns casos para ben, noutros para mal.

A pesar da inxesta de destilados polo xeral os palanadores amosaron que o nivel da LNB Sur medra xornada a xornada. En dezaseisavos caeu Agus de Almuinha, os representantes que quedaban de Se Foras Traballar e boa parte dos Paquete Pinchas. En dezaseisavos vimos duelos fraticidas como o de Rubén e Celso de Lideiras, no que o fillo non tivo piedade do seu pai e preferiu a vitoria a garantir un bo cacho na herdanza. Ou o enfrontamento entre os Treze Catorze David e Fernando, que marcaron un varado cada un e tiveron que recorrer ao desempate, no que se impuxo o segundo. Só unha moza pasou esta rolda: Fátima de Culombio, que caería en oitavos, pero á que ninguén arrebataría xa o premio á mellor xogadora feminina do torneo.

Da rolda de oitavos saíron os oito mellores do torneo, con predominio de tres escuadras con dous xogadores cada unha: Paquete Pinchas (Chupi e Charlie), Faísca (Manu e Pinto) e os sorprendentes Panzo e Chuki de Moaña, que chegaron a esta rolda logo de clasificarse nos grupos na repesca. Completaron o cadro Pablo de Culombio e Rubén de Lideiras.

Os Faísca desfixéronse de Pablo e Chuki nos seus compromisos (Pinto conseguiuno cun varado certeiro) e tiveron que desputarse entre eles un posto na final. A Pinto non o intimidou a maior experiencia do seu compañeiro de equipo (subcampión do Aberto da Poesía do Condado) e conseguiu chantarse na finalísima.

Polo outro lado do cadro Chupi acabou coas opcións do seu compañeiro de equipo Charlie, mentres Rubén conseguía o seu segundo varado do día e deixaba fóra a Panzo. A semifinal entre Chupi e Rubén caeu do lado do líder da liga, que chegaba así á súa terceira final nas catro xornadas que van de liga.

Pero a súa regularidade espectacular, a súa experiencia e o seu liderado incontestable na clasificación individual non foron suficientes para vencer a un Pinto crecido e arengado polo conxunto do equipo. O dos Faísca conseguiu a vitoria, que tamén gozou o equipo completo como mellor conxunto da xornada.

O torneo foi tamén un éxito para Assembleia Aberta, que se ben no deportivo non tiveron o seu día, si triunfaron na organización do campionato. A próxima cita será o 10 de xaneiro en Vigo. Faísca está xa organizando ese torneo no que serán os anfitrións e terán que loitar coa mala sorte que na liga está a acompañar aos equipos que xogan en casa, poida que por estar máis pendentes de organizar que de xogar.

Consultade como quedan agora as clasificacións. Xunto á posición de cada xogador/equipo na liga aparece un + cando subiu postos e un cando baixou postos respecto á xornada anterior.





Mañá chove, hai que manter as billardas enxoitas!

12 12 2008

Di Meteogalicia que mañá vai chover, pero a mal tempo boa cara! Na LNB sempre estamos preparados para a chuvia, para poder manter as billardas secas e golpealas sen empaparnos.

Así que poremos en marcha o plan B que xa tiña preparada a Assembleia Aberta do local social Baiuca Vermelha e o campionato trasládase ao pavillón do parque das Monxas. Aquí podedes ver nun mapa onde queda.

O horario mantense: inscrición a partir das 11 e comezo do campionato ás 12, para rematar pola tarde. No medio hai tempo para comer e quen queira pode apuntarse ao cocido no local de Baiuca Vermelha. Para iso é mellor anotarse mandándolle un mail a aabaiucavermelha@gmail.com.

Vémonos mañá!





Este sábado, sesión doble en Ponteareas

9 12 2008

Este sábado 13 de decembro volve a liga da Conferencia Sur da LNB cun novo torneo en Ponteareas. Organiza a Assembleia Aberta do Local Social Baiuca Vermelha e nesta ocasión porase en marcha un formato novo, con horario de mañá e tarde e xantar no medio.

A convocatoria é ás 11 da mañá co incio das inscricións, para comezar a xogar ás 12. Xogaranse os partidos correspondentes aos grupos antes da hora de plantar para comer ás 15 horas. Sobre as 17 h. está previsto reanudar a competición xogando as eliminatorias e a gran final.

O torneo desputarase no colexio Fermín Bouza Brey. En caso de chuvia, trasladarase ao pavillón do parque das Monxas.

No Local Social Baiuca Vermelha haberá un xantar popular por 8 euros, que constará de cocido, pan, viño, sobremesa, cafés e licor café. Se vos queredes anotar no xantar, poñédevos en contacto canto antes coa xente da Assembleia Aberta no correo aabaiucavermelha@gmail.com.

Non vos perdades esta nova ocasión de darlle ao pateiro. A cuarta xornada pode ser a boa, esperámosvos alí!

pateiro





Saudade da 3ª xornada e ansiedade por que chegue a 4ª

2 12 2008

Para curar a vosa saudade dese completísimo torneo que o mes pasado desputamos en Marín, aquí chega o supervídeo da 3ª xornada, que demostra que houbo tanta intensidade como se prevía no vídeo previo ao torneo. Imaxes da habilidade perfeccionista na confección das billardas, da rivalidade polo liderato e da eficacia aplastante dos Paquete Pinchas que só deixaron a mesa!

E como xa se aproxima a 4ª xornada de liga, aquí vos vai unha foto na que queda ben claro cal é o rival a bater. Aquí temos os Paquete Pinchas dándose unha nova zampada con actitude desafiante… confían en seguir dominando a liga, pero o resto dos equipos van ir a Ponteareas mentalizados para poñer contra as cordas á tropa da Louriña aproveitando o máis que probable empacho de comida e fumes que levan enriba.

Ansiosos todos e todas xa porque chegue a 4ª xornada: será o sábado 13 en Ponteareas, organizado pola Assembleia Aberta Baiuca Vermelha. Atentos á confirmación de horario e lugar.