Vídeo-inmersión no Aberto de Salceda

30 03 2009

Estamos na semana decisiva da LNB Sur. Faltan só 5 días para que todo se decida. Para afrouxar a tensión que se respira no ambiente, hoxe ofrecémosvos o último vídeo-estalo do TeleVaral: o do Aberto de Salceda. E ao igual que xornada a xornada medra o nivel dos xogadores, tamén de cada vez contamos con vídeos máis completos, propostas máis arriscadas para transformar en imaxe e música as vibracións das billardas e os paláns.

Nesta ocasión temos un vídeoclip experimental, no que Pablo Suengas nos transporta con sons electrónicos  e imaxes desestruturadas ao territorio da billarda, emulando a grandes como Michel Gondry ou Chis Cunningham.

Para cando a LNB na MTV?

Advertisements




Horario do fin de festa: aberto, gala e concerto do Leo!

27 03 2009

Xa temos horario para o II Aberto de Mos, o derradeiro torneo puntuable desta tempada da LNB Sur 2008-2009, que organizamos coa colaboración do Concello de Mos. Apuntade nas vosas axendas a data do 4 de abril e reservade a tarde enteira para poder gozar da traca final da liga: aberto, gala de entrega de premios e concerto d’O Leo i Arremecághona!

Aquí tedes o programa da xornada:

16:00h. Comezo do aberto, no Multiusos das Pozas (ao aire libre).
19:00h: Remate do aberto.
19:30h. Pinchos de balde para todos os palanadores e palanadoras.
20:00h. Gala da LNB Sur, coa entrega de premios aos mellores da liga e a todos os equipos participantes.
20:30 concerto de O Leo i Arremecághona para poñer fin á tempada 2008-2009.

Entre as 19:00 e as 20:30 o Concello organiza de forma simultánea uns actos no propio Multiusos aos que estamos convidados: malabares e percusión africana.

Este é o lugar no que imos xogar e onde se entregarán os premios:

multiusosmos

Picade aquí para acceder ao mapa en GoogleMaps.





Quentando motores para a última xornada de liga

24 03 2009

O 4 de abril cerramos a Conferencia Sur da Liga Nacional de Billarda. En Mos celebraremos o último aberto puntuable da tempada, a última oportunidade de facerse cun oco no cadro de honra da LNB Sur e clasificarse para desputar o 31 de maio en Santiago de Compostela o Play-Off Nacional.

billardamos

Será o II Aberto de Mos, porque en Mos (na parroquia de Torroso) celebramos hai un ano o primeiro campionato da LNB organizado desde o sur. Estamos traballando para que a xornada do 4 de abril sexa especial. Para iso temos preparadas algunhas novidades, e outras están en proceso de maduración. Para comezar, ese día estrearemos a quiniela da billarda, un sistema de porra aberto a todo o que queira participar e que queremos estender para a próxima tempada. Hai que acertar o nome do xogador e do equipo gañadores do torneo. A aposta é de 1 euro. O gañador leva o 70% do recadado, se hai máis dun gañador o premio é a repartir. O 30% restante queda no bote para os gastos de organización. Se non hai acertante, todo queda para os gastos de organización.

A de Mos é a última xornada, polo que ao remate do torneo celebraremos a Gala da LNB Sur, na que entregaremos os premios aos mellores da tempada: o campión individual, o campión por equipos, a campioa feminina e o campión de varados. Axustade as vosas axendas para ese sábado contar cunha horiña máis para acompañar aos gañadores na entrega de premios. Estamos preparando algunha sorpresa para esa gala da que xa vos informaremos.

Nesa carreira polos primeiros postos da liga chegamos á última xornada con moitas cousas aínda en xogo. Para que esteades ao corrente de como son as opcións de cada quen, aquí vos van algunhas pistas.

Clasificación por equipos
Os Paquete Pinchas teñen máis que asegurado o campionato por equipos. Avantaxan en 43 puntos ao seguinte da clasificación, polo que poden durmir tranquilos e ir adestrando, porque eles serán os nosos representantes no Play-Off. A cousa está máis animada por detrás: Almuinha avantaxa en 4 puntos a Faísca, e entre eles xóganse rematar 2º e 3º. Para o 4º posto hai varios candidatos: Lideiras están mellor situados con 65 puntos, pero só son 3 máis que os de Culombio, 4 máis que os de Moaña, 7 máis que os de Treze Catorze e 8 máis que os de Assembleia Aberta. Se Foras Traballar, agora novenos, poden subir algún posto, mentres que Branco e Negro terá que conformarse coa 10ª praza.

Clasificación de varados
Na primeira posición sitúase moi destacado Rubén Otero (Lideiras), con 7 varados. Se non hai sorpresas, el será o campión nesta modalidade. Os seus inmediatos perseguidores son Xosé Miguel (Faísca), Santi (Assembleia Aberta) e Fuco (Branco e Negro) con 4 cada un. Moito terán que afinar se queren quitarlle o título a Rubén. Polo de agora eles ocupan as catro prazas que dan dereito a xogar os Play-Off de varados. Pero outros que veñen por detrás tratarán de clasificarse: manteñen opcións Chupi (Paquete Pinchas) e Luis Enrique (Almuinha) con 3 varados cada un, e Rubén Sabino (Treze Catorze) e Santi (Culombio) con 2 varados. En caso de que haxa algún empate pola cuarta praza, decidiremos quen se clasifica xogándoo á billarda máis longa con dúas tentativas para cada xogador.

Clasificación feminina
A emoción mantense na pugna por saber quen é a mellor palanadora da tempada. Agora mesmo encabeza a clasificación Chus (Se Foras Traballar) con 14 puntos, seguida de Ana (Assembleia Aberta) con 12 puntos. Todo apunta a que unha delas se levará o premio á mellor xogadora. En terceira posición está Fátima (Culombio) con 10 puntos, e cuarta Diana (Almuinha) con 8. Polo momento, elas son as catro clasificadas para o Play-Off. Pero a cuarta praza vai estar desputada: Pilar (Se Foras Traballar) e Ánxela (Almuinha) teñen 7 puntos cada unha e manteñen opcións. Aínda que matematicamente hai máis xogadoras con posibilidades, parece difícil que ningunha máis chegue ata os 8 puntos que (como mínimo) serían necesarios para clasificarse. En caso de haber empate pola cuarta praza, decidiríase quen se clasifica para os Play-Off cunha carreira entre as xogadoras empatadas.

Clasificación individual
Dous xogadores chegan ao final do campionato con opcións de gañar: Rubén Otero (Lideiras) e Chupi (Paquete Pinchas). Rubén ten 39 puntos, Chupi ten 35. Para mellorar a súa puntuación, Rubén ten que facer polo menos 4 puntos máis, e Chupi ten que facer 2. Cunha vantaxe de 4 puntos, as cousas pintan mellor para Rubén, pero Chupi tamén garda as súas opcións e conta cunha vantaxe psicolóxica: Otero está organizando o último torneo, e durante toda esta liga os organizadores sempre pincharon no seu propio torneo.

Estas son as opcións:
Rubén é o gañador:
– sempre que no torneo Rubén consiga os mesmos puntos ou quede por diante de Chupi;
– sempre que Chupi non chegue a semifinais.
Empate entre Chupi e Rubén:
– se Chupi cae en semifinais e Rubén cae en cuartos de final;
– se Chupi xoga (e perde) a final e Rubén cae en semifinais;
– Se xogan a final entre os dous e gaña Chupi.
Chupi é o gañador:
– se Chupi gaña o torneo e Rubén non pasa de semis;
– se Chupi xoga (e perde) a final e Rubén non pasa de cuartos;
– se Chupi chega a semifinais e Rubén non pasa de oitavos.

En resumo: para ter algunha opción Chupi ten que chegar a semifinais, e unha vez aí conseguir 2 puntos máis que Rubén para empatar ou máis puntos de diferencia para gañar. Se empatan a puntos, xogaranse o título ao mellor de tres carreiras.

Ademais do gañador, na clasificación individual decídese quen son os oito palanadores que xogarán o Play-Off. Rubén e Chupi están matematicamente clasificados. Agus (Almuinha, 24 puntos) e Alberte (Almuinha, 23 puntos) teñen a clasificación case no peto. Tamén Xosé Miguel (Faísca), que ten 21 puntos pero conseguidos en só 5 torneos. A partir da 6ª praza a cousa complícase algo máis: Pablo (Paquete Pinchas) e Elvis (Paquete Pinchas) teñen 21 puntos, e Amil (Paquete Pinchas) é o 8º con 20 puntos. E por detrás teñen xogadores con moitas opcións de arrebatarlles unha praza. Santi (Assembleia Aberta) conta con 19 puntos, e Pinto (Faísca) e Suso Diz (Faísca) teñen 17. A medida que baixamos na clasificación, as opcións de colarse entre os oito primeiros son máis pequenas, pero tecnicamente os xogadores con 11 ou incluso algúns con 10 puntos poden optar a clasificarse: só teñen que gañar en Mos!

Así de emocionante está o panorama para a última xornada. Estade atentos ao blog para informarvos dos horarios, localización e premios do torneo de Mos, e dos detalles da gala final.





Alberte gaña o penúltimo asalto

9 03 2009

O sétimo e penúltimo aberto da primeira tempada da LNB Sur foi un torneo duro por xogarse nun terreo brando, o do campo de fútbol sete situado ao carón do pavillón de Salceda. Foron necesarios esforzos extraordinarios para erguer as billardas, que se enterraban no terreo. Pero isto, lonxe de ser un impedimento para o espectáculo, deulle emoción e vistosidade ao torneo, e permitiu que algúns xogadores se descubriran como especialistas en terreos difíciles. Ao final, Alberte de Almuinha venceu a Iván dos Paquete Pinchas. Estes volveron gañar como mellor equipo, e Pauliña de Treze Catorze foi a mellor palanadora da xornada.

Iván e Alberte, os finalistas

Iván e Alberte, os finalistas

Un total de 67 palanadores e palanadoras participaron no torneo. Por primeira vez xogamos con tres pistas á vez, co que conseguimos reducir os tempos mortos. Iso si, os que xogaron na pista esquerda tiveron que sufrir máis que ningún os charcos do terreo. Alberte forxou a súa vitoria nunha envexable regularidade. Polo camiño deixou a Rubén Otero de Lideiras (oitavos), Santi de Culombio (cuartos) e Xosé Miguel de Faísca (semis). Con eses vimbios chantouse na final contra Iván. Na súa segunda participación, o dos Paquete Pinchas clasificouse logo de eliminar a Santi de Assembleia Aberta (oitavos), David de Culombio (cuartos) e Manuel de Se Foras Traballar (semis). Foi unha final inédita na que se notaron os nervios en ambos. Logo dunha serie de golpes desafortunados, os dous introduciron a pincha no varal no mesmo número de toques. Na carreira do desempate, Alberte estivo máis fino.

O público arroupa aos palanadores na apretada final

O público arroupa aos palanadores na apretada final

Os 10 puntos de Alberte serviron para elevar a 15 os de Almuinha, salvando unha xornada na que tamén fixo un bo papel Luís Enrique (oitavos). Alberte ascendeu ata o cuarto posto da clasificación individual, xusto por detrás de Agus. E Almuinha consolidouse como segundo equipo en solitario na clasificación. Superan así a Faísca, que tiveron unha mala xornada na que só brillou Xosé Miguel, que chegou a semifinais e ademais conseguiu dous varados e suma xa catro na clasificación de varados. Achégase así algo máis a Rubén Otero, que sumou outro para deixar o seu contador en sete no que vai de liga.

Alberte recibe o premio do artesán-artista que creou a 13-14 de madeira

Alberte recibe o premio do artesán-artista que creou a 13-14 de madeira

Para os Paquete Pinchas quedou a honra do premio ao mellor equipo, grazas ao gran papel de Iván e á contribución de Amil (cuartos) e Pablo e Álvaro (oitavos). Con 122 puntos na xeral, teñen xa asegurado o premio ao mellor equipo desta LNB Sur, conseguido grazas á gran variedade de xogadores de bo nivel, que conseguen boas posicións torneo tras torneo.

Paquete Pinchas, men in black, veteranos nisto de recoller premios

Paquete Pinchas, "men in black", veteranos nisto de recoller premios

O outro equipo destacado da xornada foi Culombio, que meteu a tres dos seus en cuartos: Santi, Moi e David. O equipo sumou 15 puntos e subiu dúas posicións na clasificación, ata a quinta praza actual. Sitúase detrás de Lideiras nunha melé de cinco franquías que loitan por acabar na cuarta posición. Culombio aproveitou a mala xornada que tiveron Lideiras, Moaña, Assembleia Aberta e Treze Catorze. Algo mellor lles foi a Se Foras Traballar, nos que destacou a espectacular participación de Manuel, que estivo a punto de facerse cunha praza na final. Salceda foi o escenario do regreso á competición do equipo da Revolta. Esperamos que repitan e se consoliden para o ano vindeiro.

Outra novidade do torneo de Salceda é que parece que os Treze Catorze conseguiron superar en parte a maldición que persegue ao equipo organizador de cada torneo. Colocaron sete xogadores en dezaseisavos, pero ningún pasou desa rolda. Pero Pauliña alzouse co trofeo á mellor xogadora da xornada, para o que tivo que librar unha final de desempate con Chus de Se Foras Traballar. Por fin un trofeo quedou na casa.

David entrega o premio a Pauliña: todo queda en casa

David entrega o premio a Pauliña: todo queda en casa

Pero non só iso levaron os da asociación Treze Catorze. Tamén o recoñecemento pola boa organización do torneo, o éxito do emprazamento, da xente que pasou por alí e de atopar unha chave do 13-14 (toda unha rareza) para premiar ao mellor equipo. E quedamos impresionados cos preciosos trofeos elaborados polo pai de David para premiar aos outros gañadores da xornada. Chapeau!

Viño, callos da casa e pezas únicas para premiar aos mellores

Viño, callos da casa e pezas únicas para premiar aos mellores

A seguinte cita será a última desta tempada: en Mos o 4 de abril. Alí teremos o último aberto e entregaremos os premios finais desta primeira tempada da LNB Sur. Alí saberemos quen é o gañador individual, se Rubén Otero ou Chupi, os dous que contan con opcións. Saberemos que oito palanadores se clasifican para os play-off finais en Compostela. Coñeceremos tamén a gañadora á mellor muller, onde Chus de Se Foras Traballar e Ana de Assembleia Aberta se perfilan como favoritas. E aplaudiremos tamén ao mellor equipo e ao campión de varados.

Atentos a este blog: irémosvos informando dese último torneo e analizaremos a fondo como se atopan neste momento as clasificacións. Por agora, deixámosvos coas fotos do Aberto de Salceda.

P.S.: O domingo no All Stars de Ourense o poderío do sur deixouse ver. Aínda que no aberto non triunfamos, Chupi incrementou o seu prestixio facéndose á vez cos títulos do concurso de mates e o de triples. Enchenta de pezuñas e rabos de porco. Podes ver a epatante crónica do All Stars na web do Varal, e as fotos no Foto Varal.





As citas desta semana

4 03 2009

1ª cita:
Aberto de Salceda de Caselas (7ª xornada da LNB Sur)
sábado 7 de marzo ás 16.00 h
no campo detrás do pavillón de Salceda (se chove, no pavillón).
Premios a base de callos e viño.
Salceda estará sinalizada para que ninguén se perda de camiño ao pavillón.
cartel20pincha1

2ª cita:
All Stars 2009 de Ourense
Aberto, campionato de mates e campionato de triples
domingo 8 de marzo ás 12.00 h
no campo de chave xunto ao estadio do Couto.
Premios: cachucha de porco para @ vencedor/a do aberto, uñas de porco para @ gañador/a dos mates e rabos de porco para @ gañador/a dos triples.

Cartel da xornada organizada por Siareiros, na que se encadra o All Stars

Cartel da xornada organizada por Siareiros, na que se encadra o All Stars

Atención! buses para acudir a Ourense:
Sairá ás 9.45 h de Vigo (praza dos cabalos), coas seguintes paradas:
– 10 h Sanguiñeda (Eroski)
– 10.10 h Ponteareas (primeira rotonda)
(Estamos estudando que o bus saia antes de Marín).
A volta será ás 19.30 h desde Ourense, parando nos mesmos lugares que na ida.
Está programada unha comida en Ourense a base de cocido (non podía ser doutro xeito) ás 14.45 h.

E se pensábades que na nosa sección de vídeos nos esquecéramos do Aberto de Vigo… aquí o tedes (máis vale tarde que nunca!).