O vídeo da gran final

13 04 2008

Desde o servidor de Televaral, aquí podedes ver a emocionantísima final entre Josué e Chupi no I Aberto de Mos, na que polos puntos gañou Josué, que conseguíu o prezado lacón.

Advertisements




Xa están na Rede as fotos do Aberto de Mos

10 04 2008

Tardaron un pouco, pero xa están na rede as fotos do Aberto de Mos. Unha reportaxe completísima con 36 fotos que transmiten gráficamente a emoción que vivimos o sábado en Torroso.

Neste enlace podedes ver todas as imaxes.

Como vedes o Aberto de Mos deixounos imaxes para recordar.
A pincha…

Algúns golpes espectaculares (este a cargo de Chupi, o subcampión)…

A convivencia de veteranos e novatos…

O ambiente participativo…

O público da final…

O dura labor organizativo…

E Josué, o campión, celebrando con sidra a súa victoria!

E lembrade, a próxima cita en Xil (Meaño) coa Copa do Salnés. Debut da Conferencia Sur contra unha selección das conferencias Noroeste e Norleste.





A pincha fíxose un oco en Mos

7 04 2008

A pincha volveu voar no torreiro de Torroso, en Mos. O ruído dos paláns pegando nas billardas volveuse escoitar no sur de Galicia e esta vez regresou para quedarse. Este sábado celebrouse o 1º Aberto de Mos, cun éxito de participación extraordinario: 48 participantes, nenos, nenos, mozos, mozas e algún que outro peinando as canas. Xentes de Mos, O Porriño, Vigo e outras localidades responderon á chamada da LNB. Ás 5 da tarde iniciouse ete torneo que é a primeira pedra da futura liga regular da Conferencia Sur. A destacar a presencia de moitos nenos e xente moza de Torroso, e a chegada desde Vigo de Aitor e o equipo dos Palanganas, auténticos referentes da billarda no Sur.

Baixo un son de xustiza e co hiphop da Mafia Gallega tronando no aparato de música, botou a andar o campionato En dúas pistas paralelas xogouse a primeira fase, na que os 48 participantes se enfrontaron en 12 grupos de catro persoas. Os 24 mellores (ou máis afortunados) pasaron á segunda fase, con eliminatorias directas.

A emoción foi medrando a medida que avanzaba o torneo. Na segunda fase foron caendo algúns palanadores que nos grupos previos amosaran bo tino. Seis palanadores chegaron ás semifinais: Chupi, Cristóbal e Esteban pola parte de arriba do cadro, e Fuco, Manolo e Josué na de abaixo. Ao final, Chupi e Josué chegaron á final, co público entregado a dous palanadores que apuntan maneiras de figuras da Conferencia Sur. Ao seu favor o feito de que foron os únicos que o sábado conseguiron cadanseu varado.

E a final non puido ser máis emocionante. Ambos meteron a pincha no varal no mesmo numero de golpes, polo que tiveron que desempatar ao lanzamento máis longo. Por sorteo tocoulle a Chupito comezar. Puideron os nervios e saíulle un golpe moi malo. Pero eses mesmos nervios atacaron a Josué, que tamén fixo un lanzamento malo. Ao final houbo que medir cos paláns a distancia, e por menos de medio palán impúxose Josué.

Así que, o Aberto de Mos xa ten o seu primeiro campión: Josué.

E por equipos, os que acumularon máis puntos foron A Tropa, no que xogaban Josué, Celsito, Ioli e Xaime.

Pronto teremos aquí unha ampla reportaxe fotográfica do Aberto de Mos, e agardamos que tamén un vídeo. E non esquezades que a próxima cita é a Copa do Salnés!

Moitas gracias a todos os que participastes o sábado: Álvaro, Fran, Fuco, Mariña, Chupi, Miguel, Noni, Cholo, Aitor, Adrián, Laura, Bisco, Esme, Moi, Fátima, Santi, Porto, Silvia, Diego, Merchi, Josué, Celsito, Ioli, Xaime, Chicho, Gonzalo, Xiana, Manolo, Henrique, Miguel, Esteban, Xavi, Adri, Iago, Cristian, Piollo, Anxo, Martín, Pablo, Manu, Alfonso, Teresa, Mari, Ruben, Patri, Jota, Manuel Barcia e Miguel. E gracias tamén aos que viñeron a apoiar!





Extra, extra, torneo de billarda en Mos!

4 04 2008

Os xornais de hoxe na comarca de Vigo anuncian pasmados a celebración do Aberto de Mos: recuperación da billarda, beisbol galego… Sorpresa xeral e entusiasmo!
Aquí tedes a información no Faro de Vigo e aquí na Voz de Galicia, e hai tres días xa daban conta do campionato en Vieiros, o medio máis atento á evolución da LNB. E para hoxe, entrevista en exclusiva a Rubén Otero en Onda Cero O Porriño.

Non sei se daremos collido todos mañá no torreiro de Torroso…





Todo listo en Torroso: faltan 2 días para o Aberto de Mos…

2 04 2008

O torreiro de Torroso luce desde o sábado pasado estas espectaculares banderolas que anuncian a eminente celebración do gran acontecemento da billarda no sur de Galicia: o I Aberto de Mos. A pista na que imos xogar é a que vedes na foto. Un lugar fermosos, delimitado por altos plátanos de sombra.

Neste lugar imos delimitar dúas pistas, para que unha sirva de zona de entrenamento e na outra desenvolvamos a competición. As pistas teñen unhas características singulares que Rubén Otero define perfectamente da seguinte maneira: Pista dura, de superficie lenta, rugosa. Firme irregular. A altura dos lanzamentos está condicionada polas árbores. É longa á vez que estreita. E ten un lixeiro desnivel cara a esquerda. En resumo e nas súas palabras “unha pista para estrategas!”.

Ver mapa más grande

A cita xa sabedes, este sábado 5 de abril ás 16:30. A partir das 16:00 horas faremos as inscricións e os grupos para a competición. A estas alturas descoñecemos cantos palanadores responderán á chamada para inaugurar a Conferencia Sur da LNB, pero temos xa algunhas presenzas aseguradas: estarán algúns representantes dos Palanganas, mítico equipo de Vigo que debutou hai 3 anos na LNB como único representante meridional na disputada liga da Mariña. Tamén estarán a maior parte do grupo de intrépidos que hai un par de meses realizaron o entrenamento en Pontellas no que se deu o empurrón definitivo á idea de artellar a liga no Sur. E teremos sorpresas nas inscricións, como a posible participación dun xogador cubano, auténtica conexión entre a billarda e o deporte curmán do beisbol, no que Cuba é unha das grandes potencias mundiais.

Todo isto e máis sorpresas no Aberto de Mos. E despois do espléndido exemplo do éxito do Aberto de Lugo, que amosa como a febre pola billarda se expande. Non sei que tes pensado facer o sábado, pero eu non o pensaría dúas veces… Inscríbete xa en lnb.sur@gmail.com.





Aberta a inscrición para o I Torneo de Mos de Billarda

27 03 2008

O 5 de abril ás 16:30 en Torroso, concello de Mos, viviremos un momento histórico: dará inicio o primeiro campionato de billarda da Conferencia Sur da LNB. Pr fin as pinchas voarán no sur de Galicia nunha competición oficial.

Desde xa está aberta a inscrición. Basta con enviar un email ao enderezo lnb.sur@gmail.com. E tamén vos podedes inscribir o propio día do torneo entre as 16 e as 16:15 horas. A inscrición é individual, pero os xogadores poderán ademais agruparse en equipos de 4 a 6 persoas.

Emulando aos nosos mentores do norte, o premio ao gañador individual será un lacón, acompañado dun bo mollo de grelos. Para o equipo triunfador, a recompensa será un queixo e un marmelo. Premios gastronómicos para encher o bandullo despois do esforzo.

Xogaremos coas reglas oficiais da LNB, que aos que esteades alí vos explicaremos en detalle, pero que basicamente son as seguintes: dous xogadores enfróntanse, e van golpeando a pincha (ou billarda) alternativamente para introducila entre dous paus (o varal) a uns 50 metros de distancia. O que o consiga en menos golpes é o gañador. Iremos xogando ata chegar á gran final! E os xogadores acumularán puntos para decidir cal é o equipo con maior puntuación que se proclame gañador.

A organización terá material para todos os que asistan. Aínda así, convidámosvos a que fagades o voso material: pinchas ou billardas, de entre 15 e 25 centímetros de lonxitude e rematada en punta, e paláns ou pateiros, os paus maiores cos que golpear a pincha, duns 60 centímetros de lonxitude.

E non esquezades que, por suposto, o obxectivo é pasalo ben volvendo xogar á pincha. Apuntádevos!





Estase cocendo o I Aberto de Mos!

16 03 2008

A Conferencia Sur está estes días ultimando o que será o seu empurrón definitivo. Primeiro foi a xuntanza duns amigos, logo a presenza dunha delegación no Trofeo do Lacón de Cervo, e agora, antes incluso de presentarse oficialmente ao mundo participando en Meaño na Copa do Salnés, a Conferencia Sur organiza o seu primeiro torneo local para quentar motores, lograr que medre a afección, e xuntar forzas para chegar a Meaño con ganas de dar a sorpresa fronte aos experimentados xogadores do norte.

O 5 de abril poñede os vosos GPS orientados ao sur, porque esa tarde celebrarase o I Aberto de Mos!!!

O lugar está aínda sen confirmar, con varias opcións abertas. Estamos tamén facendo contactos para que o grupo dunha ducia de palanadores e palanadoras que nos xuntamos no primeiro ensaio medre considerablemente. Pronto teremos máis novidades, pero xa podedes marcar o sábado 5 de abril en vermello nos vosos calendarios.

E para ir abrindo boca, Fuco e Otero perpetraron esta gloriosa curtametraxe promocional. A psicose da pincha provoca enfermidades mentais difíciles de curar…

Sen dúbida un vídeo histórico por varias razóns: probablemente é a primeira audiovisual produción do sur de Galicia dedicada á pincha, e sen dúbida é a primeira aportación da Conferencia Sur a Televaral. Simplemente, espeluznante.